1,254 Бардыгы /

ЖАЛАЛ-АБАД. ЭАУнун эки студенти “Кыргызстандын мыкты студенти – 2022” сынагынын төш белгисине ээ болушту.

ЭАУнун кесиптик багыт берүү жана коомчулук менен байланыштар кызматы билдиргендей, К.Ш. Токтомаматов атындагы Эл аралык университеттин (ЭАУ, Жалал-Абад ш.) Эл аралык медициналык колледжинин “Фармация” адистиги боюнча I курсунун студенттери Рысбеков Нурбек жана Эраалыев Айтеңир “Кыргызстандын мыкты студенти – 2022” аттуу билим сынагына катышышты.

Бул сынак Кыргыз Республикасынын Маалымат, спорт жана жаштар саясаты министрлиги уюштуруусу астында 8-9-ноябрь күндөрү Бишкек шаарында өткөн. Аталган сынакта ЭАУнун аты аталган студенттери сынактын жыйынтыктары боюнча I даражадагы диплом жана “Кыргызстандын эң мыкты студенти” төш белгилери менен сыйланышты.

“Нурбек менен Айтеңирди чын жүрөктөн куттуктайбыз жана мындан ары да албан-албан ийгиликтерге жетишүүсүн каалайбыз! ЭАУнун Эл аралык медициналык колледжинин окутуучулары К.А. Сулаймановго жана З.С. Тухтакуловага студенттерибизди ушул сынакка сапаттуу даярдаганы үчүн өзгөчө ыраазычылык”,- билдиребиз дейт ЭАУнун проректору Анвар Жолдошбаев.