1,968 Бардыгы /

ОШ. ОшМУда Кыргыз Эл акыны, кинодокументалист, драматург, журналист, белгилүү коомдук ишмер, республикалык Молдо Нияз адабий сыйлыгынын лауреаты Тазагүл Закированын «Акынга Мекен керек!» аталышындагы ыр жыйнагынын бет ачары өткөрүлдү. Бул иш-чарага ОшМУнун жалпы эмгек жамааты, коомдук-саясий ишмерлер жана ыр күйөрмандары дагы катышты.

          ОшМУнун ректору, профессор Кудайберди Кожобеков Тазагүл Закированын көп кырдуу талантына токтолушуп, 75 жаш кутман курагы менен куттуктады: – Өзгөчө биз Сиздин  Ош мамлекеттик университетинин «Эмгек сиңирген ишмери» наамы, тɵш белгисинин ээси экендигиңизди баса белгилеп, дайыма сыймыктанып келебиз. Биздин окуу жайга атайын баш багып, поэзияга ышкыбоз жаштарыбызга дайыма демөөр байлатып, а түгүл акыл-насаатыңызды айтып келе жаткандыгыңызга терең ыраазычылыгымды билдирем!

          Ошентип, адабий кеченин жүрүшүндө «Дүбүрт» студенттик театры тарабынан сахналаштырылган көрүнүштөр тартууланып, «Жигер» чыгармачылык борборунун мүчөлөрү тарабынан акындын ырларынан  көркөм окулду. Белгилүү обондуу ырлары дагы кошо жаңырды. Акын Тазагүл Закированын Ата Мекен тууралуу жазылган 100 гө жакын обондуу ырлары эл арасында ырдалып, Кыргыз радиосунун алтын фондусунда дагы жазылган. Анын Ош шаары тууралуу жазылган «Ош вальсы» «Мекеним – Кыргызстан», «Оштон таптым», «Сулайман тоо», «Ошум сен, энсеп келчү ыйык шаарым», «Кусалык» өңдөнгөн ырларыңыз эл оозунда байма-бай ырдалып келатат.

          Алишер ТОКСОНБАЕВ, өз кабарчы