1,176 Бардыгы /

БИШКЕК.Касымали Баялинов атындагы Республикалык Балдар жана Жаштар китепканасынын Америка борборунда Лингва Инновациялык билим берүү Фонду жана АКШнын Кыргыз Республикасындагы Элчилиги тарабынан уюштурулган Улуттук Spelling Bee иш-чарасы аяктады.

Баса, Улуттук Spelling Bee – 2023 сынагынын жеңүүчүлөрү Кыргыз Республикасынын түрдүү аймактарынын өкүлдөрү:

• Биринчи орун: Марсель Темиркулов, Бишкек шаары, Кыргыз мамлекеттик техникалык университети

• Экинчи орун: Мунаввар Ахматкулова, Ош, Батырали Сыдыков атындагы Кыргыз-Өзбек Эл аралык университети

• Үчүнчү орун: Адинай Мукамбетова, Нарын шаары, Борбор Азия университети

• Төртүнчү орун: Арстанбек Абдылдаев, Нарын шаары, Борбор Азия университети

2023-жылдын ноябрь айында бул сынактын катышуучулары АКШ Өкмөтү каржылаган Дүйшөмбү шаарында өтүүчү Борбор Азиянын Аймактык Spelling Bee сынагында Кыргыз Республикасынын өкүлү сыңары катышышат. Ошондой эле Казакстандын, Өзбекстандын жана Тажикстандын мыкты англис тил талдоочулары менен дагы ат салышат.

Акыркы бир айдын аралыгында Кыргыз Республикасындагы АКШнын Элчилиги каржылаган сегиз Америка борборлорунда ар бир аймактан улуттук сынакка катышуу үчүн үч катышуучуну тандоо үчүн жергиликтүү орфографиялык “Spelling Bee”  сынагын уюштурду. Бул жылы Америка борборлору англис тилин туура жазуу сынагын уюштурганына алты жылга аяк басты. Бул сынактар жаштарды англис тилин үйрөнүүгө үндөйт жана Кыргыз Республикасынын бүткүл аймагындагы жаштар үчүн билим алуу мүмкүнчүлүктөрүн дагы кошо тартуулайт.

Орфографиялык “Spelling Bee” сынагы АКШда 1800-жылдары Webster сөздүгүнө жаңы басылып чыккан, сөздөрдүн стандартташтырылган орфографиясын мектеп жашындагы балдарга үйрөтүү максатында башталган. Биринчи улуттук сынак 1908-жылы Кливлендде өткөрүлүп, 1925-жылдан бери жыл сайын өткөрүлүп келе жатат. Орфографиялык сынактын катышуучулары уккан сөздөрдү сөздүктө жазылгандай, туура тамгалап айтып бериши керек. Сынактын эрежеси боюнча катышуучу сөздү уккандан кийин кайталап берүүнү, аныктамасын, cөз түркүмүн, сөздун этимологиясын жана аны сүйлөмдө колдонуп мисал берүүнү сурай алат. Англис тилинде башка тилдерден кирген сөздөр көп болгондуктан, сөздөрдүн татаалдыгы да ар кандай болушу мүмкүн.

Алишер ТОКСОНБАЕВ, өз кабарчы