1,617 Бардыгы /

ЖАЛАЛ-АБАД. 3-ноябрь күнү Бекмамат Осмонов атындагы Жалал-Абад мамлекеттик университетинде 7-ноябрь–Кыргыз Республикасынын Маалымат жана басма сөз кызматкерлеринин кесиптик күнүн утурлай майрамдык саамалык уюштурулду.

Иш-чарага Кыргыз Республикасынын Президентинин Жалал-Абад облусундагы ыйгарым укуктуу өкүлү Абсаттар Сыргабаев, облустук мекеме-ишканалардын башчылары, район-шаарлардын жетекчилери жана орун басарлары, облустагы жалпыга маалымдоо каражаттарынын өкүлдөрү катышты.

Президенттин ыйгарым укуктуу өкүлү жалпы журналисттерди келе жаткан кеисптик майрамы менен куттуктады. Өкүл өлкөдөгү жалпыга маалымдоо каражаттары коомдук турмуштун бардык чөйрөлөрүнө чоң таасир этүү менен өнүккөн жарандык коомдун эң маанилүү бөлүгү болуп саналаарын белгиледи.

“Кымбаттуу журналисттер! Сиздер, күн сайын жарандарыбыздын көйгөйлөрү менен жашап, окуялар агымынан калышпай эмгектенип келесиздер. Мындагы иш аракеттерде биздин жалпы максатыбыз –элдин турмушун жакшыртуу, мамлекетибиздин өнүгүүсү экени талашсыз. Биз, сиздер менен Жалал-Абад облусунун ар тараптуу алдыга карай багыт алуусунда тыгыз кызматташууга даярбыз!”,–деди Абсаттар Сыргабаев.

Белгилей кетсек, 1924-жылдын 7-ноябрында Кыргыздын туңгуч гезити “Эркин Тоонун” алгачкы саны жарык көргөн. Мындан улам, дал ушул күн кыргыз журналистикасынын башаты караты калыптанып калган.