345 Бардыгы /

ЖАЛАЛ-АБАД. Кечээ, 25-апрель күнү Чаткал райондук маданият үйүнүн китепканасында Чаткал районунун тургуну Мырзабек Салибаевдин “Байыркы Чаткал” Ыдырыс пайгамбардын кадам жайы” аталышындагы райондун байыркы тарыхын жана аймакта орун алган Ыдырыс пайгамбардын кадам жайы андагы күмбөздөр тууралуу жазылган китебинин ачылышы болуп өттү.Бул тууралуу Чаткал райондук мамлекеттик администрациянын маалымат кызматы маалымдады.

Мырзабек Салибаев Чаткал районунун Айгыр-Жал айылынын тургуну, 53 жаштагы автор бул китепти чыгарууда 10 жылдан ашык күмбөз тууралуу изилдөөлөрдү жүргүзүп, алардын купуя сырларын ачып берүүгө аракет кылган.

Китептин бет ачарына райондук мамлекеттик администрациясынын башчысы-акимдин орун басары Алтынай Таштанбаева, Каныш-Кыя айыл өкмөтүнүн жоопту катчысы Гүлмира Кыдыралиева, мекеме ишканалардын жетекчилери, аталган Ыдырыс пайгамбардын күмбөзүндө шайыктын милдетин аткаруучулар жана китеп окурмандар катышты.

“Бүгүнкү күн – эртеңки тарых. Чаткал өрөөнүндө дагы канча деген изилденбей жаткан жерлерибиз бар. Мындай изилдөөлөр менен биз кийинки муунга ыйык жерлерибиздин, элибиздин тарыхын баяндап бере алабыз”,- деди акимдин орун басары А.Таштанбаева. Ошондой эле китептин авторуна ийгилик каалоо менен бирге, дагы Чаткал туурасында көптөгөн китеп жарык көрөрүнө ишенгенин айтты.

Катышуучулар, окурмандар, китепти талкууга алышып, райондун тарыхы эле эмес туризм тармагын өнүктүрүүдө да салым кошот дешет. Китепте көпчүлүккө тааныш эмес окуялар, фактылар камтылып, дүйнө элинин кызыгуусун арттырарын белгилешти.

Айта кетсек, Мырзабек Салибаевдин буга чейин көптөгөн ырлары, чыгармалары гезит бетинен орун алып келсе, бул китеп анын чыгармачыл чөйрөдө тушоосун кести. Автордун алдыда жарык көрөр дагы эки китеби турат.