1,002 Бардыгы /

        Обончу Апаз Жайнаков атындагы Баткен музыкалык драма театрынын директору Бакыт Акматов ушул тапта театрда жаш кадрлар таңкыс экендигин жашырган жок. Анткени, Баткен Кыргызстандагы эң алыскы аймак болгондуктан, ал жакка барып иштөөгө баары эле макул эмес!

        Бакыт Акматовдун баамында,чыгармачыл жамааттын катарын калыңдатуу өңүтүндө активдүү иштер жүргөнү менен, жыйынтыгы дагыле ойдогудай эмес!

        – Бүбүсара Бейшеналиева атындагы Кыргыз мамлекеттик маданият жана искусство университети, Баткен облустук бийлиги менен үч тараптуу келишим түзүлгөн. Анда Баткендин бүтүрүүчүлөрүн театралдык билим алууга жиберип, каражат жагын жергиликтүү бийлик камсыздамак. Ал улан-кыздар окууну бүтүрүп барып, театрга эки жыл милдеттүү түрдө иштемек. Ооба.  Демилгени ишке ашырдык, тилекке каршы, балдардын айрымдары шаарга көнгөндөн кийин «Окуу акысын өзүм төлөйм, Баткениңерге барбайм!» дешти. Арасында «Кичи Мекениме барып сөзсүз иштеп берем!» деген патриот уул-кыздарыбыз дагы жок эмес. Жакында эле театрыбызга Бүбүсара Бейшеналиева атындагы университетти аяктаган эки кадр жана Токтоболот Абдумомунов атындагы Кыргыз улуттук академиялык драма театрынын алдындагы окуу жайды бүткөн эки жигит келишти. Ошентип, катарыбыз калыңдады. Буга улай кадр маселеси чечилип кетти дегенден алыспыз. Дагы деле башка окуу жайларга өтүнүчтөрдү үстөккө-босток жөнөтүп жатабыз! — деди обончу Апаз Жайнаков атындагы Баткен музыкалык драма театрынын директору Бакыт Акматов.

        Ошентип, элеттеги театр жетекчиси Бакыт Акматов кадр маселесин ыкчам, ошондой эле биржаңсыл чечүүдөгү дагы бир ыкма сыңары Баткендеги мамлекеттик университетте актер жана режиссерлорду даярдаган адистиктерди ачса болоорун дагы кошумчалады.

        Алишер ТОСКОНБАЕВ, өз кабарчы