3 Бардыгы /

Ала-Бука районунда Кыргыз Республикасынын Президентинин “Улуттук нарк жөнүндө” жана  «Инсандын руханий-адеп-ахлактык өнүгүүсү жана дене тарбиясы» жөнүндө жарлыгынын алкагында “Жылдызы жанган Жалал-Абад” аталышындагы улуттук форум эң  жогорку деңгээлде өттү.

Иш-чарага Кыргыз Республикасынын Мамлекеттик катчысы Сүйүнбек Касмамбетов, Кыргыз Республикасынын Президентинин Жалал-Абад облусундагы  ыйгарым укуктуу өкүлүнүн орун басары Максат Сыдыков жана үч райондун Аксы, Ала-Бука, Чаткал райондорунун бийлик өкүлдөрү, таланттуу, чыгармачыл инсандар катышышты.

Улуттук форумда касиеттүү каада-салт, уңгулуу үрп-адат, улуттун кан-жаны менен жаралган улуу кеп туурасында сөздөр айтылды. Форумга Добул Шабданов атындагы Балдардын билим берүү борборунун эмгек жамааты, нечен кылымдар бою муундан-муунга таберик болуп келаткан улуттук кийимдер парадын уюштуруп, байыркы кыргыз аялдарынын кийимдеринин коллекциясын даярдап  көргөзүштү. Ийримдерге катышкан окуучулар жана мугалимдер тарабынан табигый жүндөн жасалган “Кыргыз жери” аталышындагы этно көргөзмө келген коноктордун купулуна толуп, кызыгууну арттырды. Иш-чаранын жүрүшүндө  “Грация” бий ийримине катышкан бийчи кыздар тарабынан улуттук бийлер эң жогорку деңгээлде аткарылды.  

Улуттук форумда ата-баба табериги, улуттук идеялар, элдик каада-салт, адамдык  нарк-насил, жаштарга терең билим жана таалим-тарбия берүү, дени сак муунду туура өстүрүү сындуу бир катар орчундуу маселелер талкууланды.

Мамлекеттик катчысы Сүйүнбек Касмамбетов улутту улут кылган, улут учун  узартып, улут наркын арттырган тарыхыбызга, тилибизге, маданиятыбызга, ата-баба тарых-таржымалына, салт-санаасына токтолуп өттү. Ата-баба салтын тутпаган, наркын күтпөгөн адам баласынын арымы кыска, келечеги бүдөмүк болорун баса белгиледи.

Кыргыз эли бир нече жылдар мурун улуттук каада-салттар, улуттук оюндар, мейман күтүү, маек куруу, улуттук кол өнөрчүлүк сыяктуу салттуу маданиятка басым жасап келишсе, ал эми бүгүнкү күндө мындай көрүнүштөрдү сейрек кездештирүүгө болот. Жаштар – өлкөнүн башкы таянычы, бакубат келечеги.  Ошондуктан ар бирибиз келечек урпактарыбыздын камын көрүп, мекенчилдикке, атуулдукка тарбиялашыбыз зарыл!

Таалайгүл ӨМҮРОВА, Д.Шабданов атындагы Балдардын

 билим берүү борборунун директору, Ала-Бука району