3 Бардыгы /

Кечээ, 22-апрелде К. Ш. Токтомаматов атындагы Эл аралык университетте (ЭАУ, Жалал-Абад ш.) Улуу Ата Мекендик согушта жеңиштин 80 жылдыгына арналган “Эч ким, эч нерсе унутулбайт!” аттуу майрамдык концерт өткөрүлдү.

ЭАУнун Кесиптик багыт берүү & коомчулук менен байланыштар кызматы билдиргендей, аталган майрамдык иш-чарага Жалал-Абад шаарынын мэриясынын вице-мэри Г.К. Таштанбекова, Кыргызстан элдеринин ассамблеясынын Жалал-Абаддагы бөлүмүнүн төрагасы К. А. Тилекеев, Жалал-Абад облусунун “Славян диаспорасы” ассоциациясынын төрагасы В.В. Малюженко ж. б. уюм-мекемелердин жетекчилери, өкүлдөрү чакырылган. Майрамдык концерт ЭАУнун философия жана табигый илимдер кафедрасы (т.и.к., доц. М.С. Мырзабаева), мамлекеттик, расмий жана чет тилдер кафедрасы (фил.и.к., проф. К.У. Пайзуллаева), о.э. Маданий-эстетикалык борбору (М.А. Гайымов) тарабынан даярдалган. Иш-чаранын алкагында тарыхый окуялар, көркөм чыгармалардан үзүндүлөр сахналаштырылып, согуш жылдарында “Жеңиш күнү”, “Өткөн мезгилдин баатырлары жөнүндө”, “Катюша”, “Караңгы түн”, “Жер төлөдө”, “Кырк бешинчи жылдын жазы” ж.б. таанымал ырлар жаңырып, алардын обонунда бийлер аткарылды.

Ошондой эле Жалал-Абад жергесинин согуш баатырлары жөнүндө маалымат берилди, алар Тукубай Тайгараев, Розы Азимов, Михаил Бабкин, Василий Крикун, Евдоким Мазков ж.б. Иш-чара концерттик номерлер тарыхый сүрөттөр жана видео материалдар менен коштолуп турду. Айрым учурларды тарыхый реконструкциялоо, согуш жылдарындагы аскердик кийимчен каармандар, ППШ автоматтары, Мосиндин мылтыгы сыяктуу теаралдык жабдуулар, советтик туулар концерттик номерлерге ошол замандын чыныгы демин кадимкидей тартуулады. Меймандардын жана катышуучулардын айтуулары боюнча аталган майрамдык иш-чара жогорку уюштуруучулук жана көркөм деңгээлде өткөрүлдү. Барпы Алыкулов атындагы Жалал-Абад областтык театрына, ошондой эле ЭАУнун окуу-өндүрүштүк тигүү цехине көмөк көрсөткөндүгү үчүн өзүнчө ыраазычылык билдиребиз!