2,930 Бардыгы /

БИШКЕК. Президент Сооронбай Жээнбеков «Манас» жана Чыңгыз Айтматов улуттук Академиясын түзүү жөнүндө Жарлыкка кол койду

Ошентип, «Манас» эпосун, жалпысынан кыргыздардын эпикалык маданиятын, Чыңгыз Айтматовдун дүйгөлүк мааниге эгедер көркөм, гуманисттик, философиялык-этикалык мурасын сактоо жана жайылтуу, ар тараптан терең изилдөө – аталган Жарлыктын негизги максаты. Жарлыкта баса белгиленгендей, Кыргыз тили, байыркы жана соңку тарыхтын бай маданий мурасы азыркы учурда жана келечекте Кыргыз улуттук мамлекеттүүлүгүнэн руханий негизин түзүп, өмүп келаткан муундарды тарбиялоо ишинде адеп-ахлактын өзөгү жана карманган жолу болушу керек.

Ал эми кыргыздардын “Манас” эпосу БУУнун Башкы Ассамблеясынын Резолюциясына ылайык Кыргызстан элинин гана эмес, бүткүл адамзаттын дагы руханий жана тарыхый-маданий дөөлөтүнүн бөлүнгүс бөлүгү болуп таанылды. Мындан тышкары “Манас. Семетей. Сейтек” эпикалык үчилтиги ЮНЕСКОнун Адамзаттын материалдык эмес маданий баалуу мурасынын репрезентативдүү тизмесине кирди. Ошондой эле 2018-жылдагы Ысык-Көл Эл аралык форумунун катышуучуларынын дүйнөлүк лидерлерге, мамлекет башчыларына, коомдук ишмерлерге, илим, маданият жана искусство ишмерлерине кайрылуусу эске алынды.

Жаңыдан түптөлгөн Академиянын ишине “Манас” эпосунда, Кыргыз элдик эпикалык маданиятында, Чыңгыз Айтматовдун чыгармачыл мурасында камтылган көөнөрбөс руханий, адеп-ахлактык жана этикалык баалуулуктарды жайылтууга жана популярдаштырууга, илимий, техникалык жана искусство таануучулук изилдөөлөргө көмөк5 көрсөтүү, илимий-практикалык, илимий-техникалык конференцияларды, долбоорлорду, сынактарды, симпозиумдарды жана башка олуттуу иш-чараларды, анын ичинде Эл аралык иш-чараларды уюштуруу, өткөрүү жана аларга катышуу, илимий-изилдөө, илимий-популярдуу эигектерди, мезгилдүү жана сериялык тематикалуу басылмаларды чыгаруу, аудио-визуалдык, окутуучу-агартуучу, таанып билүүчү материалдарды даярдоо сунушталды.

Ошондой эле бул Улуттук Академия Эл аралык гуманитардык комплекстүү программаларды жүзөгө ашырууга багытталган сунуштарды талкуулоо жана иштеп чыгуу максатында дүйнөлүк маданияттын ишмерлеринин диалогдору жана жолугушуулары өтүүчү аянтча сыңары Ысык-Көл Эл аралык Форумунун ишин толук кандуу камсыз кылат. Улуттук жана дүйнөлүк адабияттын казынасынын ажырагыс бөлүгү сыңары «Манас» эпосун, Кыргыз элинин башка эпикалык жана руханий мурасын, ошондой эле Чыңгыз Айтматовдун чыгармаларын Жергиликтүү, Улуттук жана Эл аралык деңгээлдерде жайылтуу боюнча чыгармачыл бирликтердин, жарандык коомдун башка уюмдарынын жана жалпыга маалымдоо каражаттарынын демилгелерин кубатап, иш-чаралардын комплекстүү тематикалык планын илимий-изилдөө, агартуу, маалыматтык-коммуникациялык иштин негизинде иштеп чыгат жана анын ишке ашырылышын дагы камсыз кылат.

Айтмакчы, Кыргыз Республикасынын Президенти Сооронбай Жээнбеков Манас жана Чыңгыз Айтматов Академиясын түзүү чечими кабыл алынганы жөнүндө өткөн 12-декабрында Бишкек шаарында жазуучу Чыңгыз Айтматовдун 90 жылдык мааракесине арналган салтанаттуу жыйында билдирген эле.

Алишер ТОКСОНБАЕВ, өз кабарчы