2,169 Бардыгы /

         АНКАРА. IV Түрк Дүйнөсү даректүү тасмалар фестивалына Кыргыз-Түрк «Манас» университетинин коммуникация факультетинин студенти Айдана Топчубаева «Аяна» аттуу фильми менен катышып, биринчи орунду ээледи.

Баса, аталган Эл аралык фестивалдын алкагында калыстар тобуна тартууланган Кыргызтасмасы жана  башка өлкөлөрдүн тасмалары «Тогуз өлкө, тогуз шаар, бир фестиваль» урааны астында Түркия, Кыргызстан, Казакстан, Өзбекстан, Азербайжан, Македония, Венгрия жана Герцеговина жана Түндүк Кипр Түрк республикасында уюштурулуп жаткан иш-чараларда байма-бай көрсөтүлөт. Быйыл аталган фестивалда түрк тилдүү өлкөлөрдөн150дөн ашуун тасма ат салышкан. Даректүү тасмалар кесипкөйлөр жана студенттер категориясында калыстар тобунун катуу сынынан өттү. «Аяна» тасмасы студенттер категориясы боюнча мелдеште жеңишке жетишти. «Аяна» даректүү тасмасында улакчы болууну кыялданган кичинекей кыздын күнүмдүк турмушу таасын чагылдырылат.

Айдана ТОПЧУБАЕВА бул тасмасын дипломдук иш катары филология илимдеринин кандидаты Г.Станалиеванын көркөм жетекчилиги астында тарткан.   Белгилей кетчү жагдай: Түрк Дүйнөсү даректүү тасмалар фестивалы Түрк Дүйнөсү журналисттер Федерациясы тарабынан жыл сайын өткөрүлүп келатат.

         Алишер ТОКСОНБАЕВ, өз кабарчы