1,143 Бардыгы /

ЖАЛАЛ-АБАД. Аксы районунун Жаы -Жол айыл аймагына караштуу Жоробек Мамытбеков атындагы орто мектептин окуучусу Айдай Аалиева республикалык альтернативдик олимпиадага катышып 1-орунду жеңип алды.

Аталган райондун Жаңы -Жол айыл аймагына караштуу Ж.Мамытбеков атындагы орто мектептин окуучусу Айдай Аалиева мектеп окуучуларынын физика сабагынан республикалык альтернативдик олимпиадага катышып 1-орунду жеңип, Кытайдын Тайвань шаарында өтүүчү Азия өлкөлөрүнүн олимпиадасына катышууга жолдомо алып, баалуу сыйлыкка татыктуу болду. Аны окуткан мугалими Сүйүмкан Умарова эжекенин кубанычы чексиз. Анын окуучулары буга чейин да физика, математика олимпиадаларда жеңүүчүсү болууга жетишишкен.

Ал эми Жунай Мавлянов атындагы инновациялык жатак лицей мектебинин үч окуучусу “Зомбулукту актаба” аттуу республикалык конкурска катышып, республикадагы 83 мектептин ичинен биринчи орунду жеңип алышты. Алар: Алишер уулу Сагынбек, Бермет Камчыбекова, Аяна Бекболотова, Орозгүл Алмазбекова, Нурдан Керимкулов жеңүүчү болуп чыгып бирден ноутбук жана Ардак грамоталар менен сыйланышкан. Ал эми Алишер Молдокеев атындагы орто мектептин окуучусу кол күрөшү боюнча Жибек Каратаева дүйнөлүк мелдешке жолдомо алып олтурат. Чекиров атындагы орто мектебинин окуучулары Мээрим Эмилбекова, Гүлбурак Маданова география сабагынан республикалык олимпиадада жеңишке жетишти. Үч- Коргон айылындагы Солпиев атындагы орто мектептин окуучусу Бекболсун Самаганов математика сабагынан республикалык олимпиадада биринчи орунду камсыз кылды. Жеңүүчүлөргө Аксы районунун акими Жыргалбек Шакиев жана Кербен шаарынын мэри Нарматалы Эсеналиев

баалуу белектерди, Ардак грамоталарды жана акчалай сыйлыктарды тапшырып жеңиштери менен куттукташты. Ал эми окуткан мугалимдерине да акчалай сыйлыктарды тапшырышты. Аксы райондук билим берүү бөлүмүнүн башчысы Талантбек Эмилбеков, акын жазуучу Абдымомун Калбаев куттукташып каалоо тилектерин айтышты. Окуучулар дагы чоң олимпиадалык мелдештерге катыша тургандыктарын билдиришти.

Абдымомун КАЛБАЕВ, Аксы району