3,054 Бардыгы /

ОГПИ (Ош гуманитардык педагогикалык институту) быйыл ОшМПУга (Ош мамлекеттик педагогикалык университетине) айландырылгандан бери чукул арада көлөмү көбөйүп, адистиги дагы арбыды. Дасыккан эмгек жамааты жоопкерчиликти илгиртпестен сезип, заманбап жана мыкты кадрларды гана белендегенге беттеди.

 Самат СЕЙИТБЕКОВ, Кыргыз жараны, Москва шаарынын тургуну: – Атайын Орусиянын башкалаасынан келип, ОшМПУну гана тандап, акыры тапшырдым. Эл аралык мамилелер адистигине илиндим. Буюрса, болочокто элчилик кесипти аркалаймын.  Биринчиден, эл-жер аралап таанып, өзүмдү өнүктүрүп-өстүрөм. Экинчиден, Кыргызстанымды бүтүн дүйнөгө жакшы жагынан гана таанытууга салым кошуу ниетимде бар.

Саламат РАВШАН кызы, Өзгөн районунун Ак-Терек кыштагынын жшоочусу: – Кичинемден агартуучулукка өлө кызыкчумун. Ошол себептүү тилегимди орундатуу максатында Ош мамлекеттик педагогикалык университетинин башталгыч класстар мугалими адистигине токтолдум. Жаш муундарга татыктуу тарбия берип, Кыргызстандын мыкты келечегин өстүрүүгө бдан ынтызармын. Анан дагы бул кесип оңбогондой түйшүктү, ошондой эле талыкпаган изденүүнү гана талап кылат эмеспи. Буга мени ОшМПУ кыска аралыкта сөзсүз каныктырат деген терең ишеничтемимн!

ОшМПУга тапшырууда онлайн системасы кендирибизди кесип келаткан жемкорлукка, ошондой эле тааныш-билишчиликке дагы биротоло чекит койгондугун Ош мамлекеттик педагогикалык университетинин кабыл алуу комиссиясынын жооптуу катчысы Токтогул ЫСАКОВ дароо моюндады.

• Талапкерлер үйүндө жамбаштап жатып алышып эле онлайн түрүндө

баарын тегиз көрүп олтурушат.  ЖТРдын жыйынтыгын эч ким бурмалай албайт! – деди Ош мамлекеттик педагогикалык университетинин кабыл алуу комиссясынын жооптуу катчысы Токтогул ЫСАКОВ. – Азырынча университетибизге 1500 чакты гана талапкер документ тапшырды. А кабыл  алуу жараяны аяктагыча дагы жалпы жонунан 2500 чакты талапкер багын сынайт деген терең ишеничтемин! А быйыл бюджетке 202 орун ажыратылды. Буга дагы күрөш – сынак чоң болот.

Ошентип,  заматта институттан эле университетке айланган ОшМПУ Кыргыз Өкмөтүнүн жана жалпы эле Кыргыз элинин зор үмүтүн актаар бекен? Муну, албетте, мезгил өзү жакын арада көрсөтөөрүнөн күмөн жок!

Алишер ТОКСОНБАЕВ, өз кабарчы