2,568 Бардыгы /

ЖАЛАЛ-АБАД. Бүгүн, 22-февралында К.Ш. Токтомаматов атындагы Эл аралык университеттин (ЭАУ, Жалал-Абад ш.) чоң жыйындар залында 23-февраль – Мекенди коргоочулар күнүнө карата “Кырк чоро” аттуу тамашакөйлөр жана амалкөйлөр (КВН) сынагы өткөрүлдү.

ЭАУнун Кесиптик багыт берүү жана коомчулук менен байланыштар кызматынын маалыматына ылайык, аталган сынакка ЭАУнун институттарынан жана колледждеринен 5 команда катышты, алар: 1) Үзгүлтүксүз ачык билим берүү институтунан “Тайманбас”; 2) Эл аралык Кыргыз-Түрк институтунан “Анкара-Бишкек”; 3) Гуманитардык-экономикалык колледжден “Динамит”; 4) Эл аралык Кыргыз-Түрк колледжинен “Торнадо”; 5) Эл аралык медициналык институтунан “Ак Шумкар” командалары. Сынак ЭАУнун Эл аралык Кыргыз-Түрк лицейинин кенже класстарынын окуучуларынын куттуктоосунан башталды. Бардык командалар сахнага шаңдуу жана жаркын саламдашуулар, андан кийин чыгармачылык менен аткарылган үй тапшырмалары, соңунда аскердик ырларга тамашалуу пародиялар менен чыгышты. Көрүүчүлөр, ошол эле мезгилде күйөрмандар, өз командаларын кызуу колдоп, кол чаап турушту. Абдан шайыр, бирок айыгышкан атаандаштыкта, “Динамит” командасы жеңишке ээ болду. КВН сынагынын жеңүүчүлөрү жана активдүү катышуучулары ректораттын атайын дипломдору, акчалай сыйлыктары менен сыйланышты. ЭАУнун агайларын жана студент жигиттерин Мекенди коргоочулар күнү менен куттуктайбыз!