1,200 Бардыгы /

ЖАЛАЛ-АБАД. Аксы районунудагы Кош-Дөбө айыл аймагына караштуу Темиркул Мавлянов атындагы орто мектепке мына ушул мектептин бүтүрүүчүсү Аселкан Конгайтиеванын  колдоосу  менен мындан эки жыл мурда “Ынтымак” аллеясы курулуп ачылган.

“Ынтымак” аллеясынын негизги максаты мектеп окуучуларын айылда маданиятка үйрөтүп, айылдын көркүн арттырып, келечекте айылды көрктүү айылга айландырууга жаштарды тарбиялоо болчу. Быйылкы жылда эле мектеп жамааты бул аллеяны миң түптөн ашык түркүн көчөттөр менен толукташты.  Аллеяда түркүн түс гүлдөр бажырайып коргондун көз жоосун алып турганы кандай ырахат. Мугалимдер да чарчаган мезгилде оргуманын жанына келип эс алып басып жүргөнүн көрүп көңүл көтөрүлөт. Аталган аллеяда түркүн балатылардын, арча, кайыңдардын, роза гүлдөрүнүн өсүп келетканы келечектен көптү үмүттөндүрөт. Анткени бул жерде мектеп окуучулары гүл өстүргөндү, алма бактарын сугарып карганды, кооздукка суктанууну үйрөнүшүп жатат.

Быйылкы жылда Аселкан бул аллеяны эс алып олтуруучу салкын жайга айландырды. Ичинде эс алып олтуруучу орундуктары бар. Бул жай өзгөчө мектеп окуучуларын кубанычка бөлөдү. Салкын жайдын  ачылышына Аселкан Конгайтиева өзү келип катышып, айыл аксакалдарынын катышуусунда тасмасын кыркып, мектеп жамаатын бул куттуу жайы менен куттуктады. Аселканга жасап жаткан иштери үчүн айыл эли, мугалимдер ыраазычылыктарын билдиришти. Кош-Дөбө айыл аймагынын кызматкери Полот Тасмабек уулу Аселкан Конгайтиевага Аксы райондук мамлекеттик  администрациясынын “Ыраазычылык катын” тапшырып, көрсөткөн жардамы үчүн терең ыраазычылык билдирди. Мына ушул салкын жайдын ачылыш аземи жүрүп жатканда мектептин бүтүрүүчүсү Бекболот Сартмырзаев мугалимдердин усулдук кабинетине аквариум коюп бергендиги   айтылып, ак батага арзыды. Бул мектептеги жалгыз эле жаңылык эмес, мугалимдердин усулдук кабинет бардык жасалгалары, эмеректери менен жасалгаланып берилгени да мугалимдер үчүн чоң жаңылык жана шарт болуп калды.

Абдымомун КАЛБАЕВ, Аксы району