1,758 Бардыгы /

ЖАЛАЛ-АБАД. Бүгүн, 9-июнда Жалал-Абад шаарындагы мектептерде акыркы коңгуроо кагылып, бүтүрүүчүлөрдү узатуу салтанаты өттү.

Жалал-Абад шаардык мэриясынын маалымат борбору маалымдагандай, шаардагы мектептерде өткөн бүтүрүү кечелерине Жогорку Кеңештин депутаты Айбек Маткеримов, Президенттин Жалал-Абад облусундагы өкүлчүлүгүн аппарат жетекчиси Ислам Масабиров, шаардын биринчи вице-мэринин милдетин аткаруучу Эрнист Зияйдинов, вице-мэрлер Элдос Таев жана Гүлбарчын Таштанбекова, шаардык билим берүү бөлүмүнүн башчысы Рысбек Калчаев баштаган жергиликтүү бийлик өкүлдөрү, ички иштер бөлүмүнүн башчысы, ата-энелер мугалимдер жана окуучулар катышты.

Иш-чарада 2021-2022-окуу жылын жыйынтыктоо менен алдыңкы окуучу, алдыңкы мугалимдерге ардак грамоталар жана ар тараптан колдоо көрсөтүп, окуучулар үчүн шарт түзгөн ата-энелерге ыраазычылык каттар тапшырылды.

Быйыл Жалал-Абад шаарында жалпысынан 865  окуучу 11-классты, 1915 окуучу 9-классты аяктап жатат. Алардан 4 окуучу алтын тамгага ээ болду.

Белгилей кетсек, бүтүрүүчүлөрдүн коопсуздугу үчүн бүгүн, шаардык ички иштер бөлүмү тарабынан посттор уюштурулуп, бүтүрүүчүлөрдүн эс алууларга чыгып, кафе-ресторандарга баруусуна жана унаалар менен айлануусуна тыюу салынган. Эгер мындай учурлар катталса, мыйзам чегинде чаралар көрүлөт.