1,227 Бардыгы /

ОШ. Ноокат райондук мамлекеттик санитардык-эпидемиологиялык Көзөмөл борборунда заманбап вирусологиялык лаборатория ишке киргизилди.

Саламаттык сактоо министрлигинин басма сөз кызматынан маалымдашкандай, лаборатория Ислам өнүктүрүү банкынын “COVID-19 учурунда чукул жардам” долбоорунун алкагында курулган. Министрликтен тастыкташкандай, бул лаборатория ILAB маалымат системасына туташтырылган.

Ошентип, бул лабораториялык маалыматтык тутумдун артыкчылыгы – паспорттук маалыматтар Мамлекеттик каттоо кызматынын маалыматтык системасы менен туташып, техникалык каталарды жокко чыгарат. Система бейтаптын паспорттук маалыматтарын өзү киргизет. Бейтаптар лабораторияга келбей эле ПЧР анализинин жыйынтыгын өздөрү  басып чыгарып ала алышат. Бул адамдар менен ашыкча жана түз байланышты дагы жокко чыгарат. Бул лаборатория үчүн дагы жана бейтап үчүн дагы өтө эле ыңгайлуу. Кошумчалай кетээрибиз, бул лабораториялар “COVID-19суз саякаттоо” тиркемесине туташтырылган.

Белгилей кетчү жагдай: республика боюнча бардыгы он жаңы ПЧР лабораториясын куруу пландаштырылууда. Ушул тапта Каракол, Талас, Ысык-Ата, Жайыл, Сокулук, Ноокаттагы лабораториялардын курулушу аяктады. Келечекте бул лабораториялар коронавирустук инфекциянын лабораториялык диагностикасынан тышкары башка инфекцияларды (сасык тумоо, кызамык, кызылча, гепатит жана башкалар) ПЧР аркылуу аныктайт деп күтүлүүдө.

Алишер ТОКСОНБАЕВ, өз кабарчы