2,067 Бардыгы /

ЖАЛАЛ-АБАД. Быйыл Жалал-Абад шаарында республикалык дем берүүчү гранттын жана жергиликтүү бюджеттин эсебинен төрт мектептин жана бир бала бакчанын айнек-терезелерин алмаштыруу, короо-жайын асфальттоо иштери жасалууда.

Жалал-Абад шаардык мэриясынын маалымат борбору билдиргендей Жалал-Абад шаарынын мэринин орун басары Элдос Таев баштаган комиссиялык топ аткарылган жумуштарды текшерип чыкты.

Жалал-Абад шаарында жайгашкан №15 Рябинушки бала бакчасы 1965-жылы салынган, андан бери капиталдык оңдоп-түзөөдөн өткөрүлгөн эмес, чатырынан суу тамып, айнектери кулап түшүү коркунучунда болгон. Жергиликтүү бийлик долбоор жазып, дем берүүчү гранттын эсебинен чатыры, айнек-терезелери жана эшиктери толугу менен алмашып, учурда иретке келтирүү иштери кызуу жүрүүдө.

Шаардагы №9 Раатбек Санатбаев атындагы мектеп-гимназиясынын короосуна брусчатка басылып, бир бөлүгүнө асфальт төшөлдү. Ал эми №11 Адамбай Калешов атындагы орто мектептин жылытуу системасы толугу менен бүткөрүлүп, учурда мектеп жаңы окуу жылына даяр абалда.

№10 Тойгонбай Кошматов атындагы орто мектептин айнек-терезелерин алмаштыруу аягына чыкпаганы жана окуу жылына даяр эместиги комиссиялык топ тарабынан катуу сынга алынды. Белгиленген мөөнөткө бүткөрүү боюнча курулушту жүргүзгөн жана көзөмөлдөгөн тарапка катуу тапшырма берилди. Ошондой эле №16 мектептин чатыры алмаштырылып, сыртын актап-сырдоо иши жүргүзүлдү.

Жогорудагы курулуштарга 16 млн. 400 миң сом сарпталууда. Анын 70%ы республикалык дем берүүчү гранттын эсебинен болсо, калган 30%ы жергиликтүү казынадан бөлүнгөн.

Эске салсак, өткөн жылы дем берүүчү гранттын эсебинен Жалал-Абад шаарында 3 үй-бүлөлүк дарыгерлер тобунун имараты, бир бала бакча оңдоп-түзөөдөн өткөрүлүп, №8 мектептин айнек -терезелери алмашылган. Ошондой эле бир бала бакчанын саркынды суу түтүкчөлөрү алмашылып, азык-түлүктөрдү сактоочу кампасы курулган.