786 Бардыгы /

ЖАЛАЛ-АБАД. Жумушчу сапар менен Россия Федерациясынын Билим берүү министрлигинин өкүлү Олег Чижаковский, М.Акмулла атындагы Башкортостан мамлекеттик педагогикалык университетинин аналитикалык кабинетинин директору Радик Юлбаев менен Жалал-Абад шаарынын  мэринин орун басары Элдос Таев жана Гулбарчын Таштанбекова жолугуп,  мектеп салынуучу жай менен жеринде таанышышты.

Жалал-Абад шаардык мэриясынын маалымат борбору билдиргендей, мектеп салуу үчүн жергиликтүү бийлик тарабынан Спутник кичи районунан 3 гектар жер тилкеси бөлүп берилген. Аталган мектеп 1200 орундуу болот. Мектеп эл аралык стандарттарга ылайык салынып, окутуу ыкмасы да заманбап талаптарга төп келмекчи. Жаңы мектеп  Орусия өкмөтүнүн каржылык колдоосу менен салынат. Мектепте окутуу орус тилинде болот, эгер зарылчылык болсо, кыргыз тилдүү класстар ачылат.

Белгилей кетсек, билим берүү тармагындагы кызматташтык келишимине Президент Садыр Жапаровдун Орусияга болгон иш сапары учурунда кол коюлган. Ага ылайык, Кыргызстанга жалпы 9 жаңы мектеп куруу макулдашылган.