936 Бардыгы /

          ОШ. Баткен облусунун Тажикстан менен чектешкен айылдарынан эвакуацияланып келишкен жарандарды  ОшМУ тарабынан даярдалган жатаканаларга жайгаштыруу жараяны дагыле улантылууда. Ушул тапта, алардын алтоо ОшМУнун медициналык клиникасында ар тараптуу дарыланып жатышат.

Баткенчилердин басымдуулугу кан басымы жогорулап кайрылышкан. Бүгүнкү күндө клиниканын дарыгерлери тарабынан бардык анализдери алынып, УИД, ЭКГ, рентген өңдөнгөн бардык аппараттардан дыкаат текшерүүдөн өтүшүп, дарылоо иштери башталды. Булар медициналык клиникада жалпы жонунан 10 күн дарыланышат.

– Үй-бүлөбүздө 5 адамбыз. Адегенде эл менен кошулуп баарыбыз тең Кадамжай районуна бардык. Ал жерде башымдын ооруганы таптакыр басылбаганынан дарыгерлер «Томографияга түшүңүз?» деп мени Ош шаарына  жөнөтүштү. ОшМУнун штабындагылар жардам берип томографияга түшүрүп, андан кийин ушул клиникага алып келишти. Бул жердегилер баароыбызды тең бир тууганындай кабыл алышып, а түгүл кыздар жуунтуп, ысык тамак берип, дароо укол сайып, дары ичиришти. Бардык анализдер алынды. Керектүү бардык каражат, кийим-кече менен камсыздашты, 4 маал ысык тамак берип дагы жатышат. Бизге өзгөчө көңүл буруп, кам көрүп жаткандаржын баарына тең ыраазымын! Элибизде мындан ары аманчылык болсо экен? – деп тиленди Баткен облусунун тургуну Халима Юсупова.

– Биз эл менен агылып ОшМУга келип калдык. Жатаканага жайгашкандан тартып бизди ыктыярчылар аябай жакшы кабыл алышты. Керектүү каражаттар, кийим-кече, тамак аш менен камсыздап жатышты. Дарыгерлер текшерип, күнү-түнү жаныбызда болуп атышат. Кече кан басымым көтөрүлгөнүнөн ушул клиникага моминтип алып келишти. Бардык анализдеримди алышып, дарылап дагы жатышат. Шарттары жакшы экен. Мекенибиз тынч болуп, балдарыбыздын келечеги кең болсо экен? – деп кудайдан тиленди Баткен облусунун Согмент айылынын тургуну Бурмабү Матраимова.

Ушул тапта “ОшМУ Баткен менен” штабы 24 саат бою качкын жарандар менен ийиндеше иштешип жатышат. Аталган жогорку окуу жай тарабынан даярдалган жатаканаларга ушул тапта 682 жаран жайгаштырылды. Булардын арасынан Ош облустук ооруканасына үч жаран, балдар ооруканасына төрт бала жөнөтүлдү. Ал эми  алты жаран ОшМУнун медициналык клиникасында эле дарыланышууда.

Алишер ТОКСОНБАЕВ, өз кабарчы