1,842 Бардыгы /

БАТКЕН. Баткен облустук акимчилигинин алдында бүгүн 27-сентябрда адамдар чогулушуп, Кыргыз-Тажик чек арасы боюнча кабыл алынган соңку чечимдер туурасында өзүнчө  кеёири түшүндүрмө берүүнү катуу талап кылышты.

Бул акцияга Баткен районунун Ак-Сай, Самаркандек жана чек ара тилкесинде жайгашкан башка дагы айылдардын тургундары катышты. Чогулгандар менен Баткен облусунун башчысы Абдыкерим Алимбаев жолугушту. Алар Улуттук коопсуздук боюнча мамлекеттик комитеттин (УКМК) төрагасы Камчыбек Ташиевдин Тажик тарап менен кол коюлган протокол тууралуу ачык маалымат берүүсүн талап кылышты.

Баса, ушул жылдын 25-сентябрында Кыргыз Республикасынын УКМКсынын төрагасы Камчыбек Ташиевдин менен Тажикстандын Улуттук коопсуздук мамлекеттик комитетинин төрагасы Саймумин Ятимовдун жолугушуусунун жыйынтыгында протокол кабыл алынган. Анын негизинде эки тараптан төрттөн бекет алынмай болгону кабарланган. 16-17-сентябрда Кыргыз-Тажик чек арасында кан төгүлгөн окуяны Кыргызстан “Тажикстандын алдын ала пландаган куралдуу агрессиясы” деп атоодо. Тажикстан дагы ушундай эле турумду бек карманууда.

Алишер ТОКСОНБАЕВ, өз кабарчы