801 Бардыгы /

ЖАЛАЛ-АБАД. Үстүбүздөгү жылдын 9-ноябрында саат 7:45 баштап жасалма такай тыгындарды болтурбоо максатында аба ырайы жана климаттык шарттар туруктуу жакшырганга дейре Бишкек-Ош унаа жолунун 81 кчакырым бөлүгүндө (Төө-Ашуу жана Сосновка) жүк ташуучу унаалардын өтүүсүнө убактылуу чектөөлөр киргизилди.

 “Кыргызавтожол” ишканасынын басма сөз кызматынын маалыматына караганда, кар жааганда жүк ташуучу унаалар Төө-Ашуудагы жолдун аркы өйүзүнө токтоп, унаалардын жүрүшүнө тоскоолдук жаратат. Ошонун негизинде аларга дайыма чектөө киргизилет. Кыргыз Республикасынын транспорт жана коммуникация министрлигине караштуу «Кыргызавтожол» мамлекеттик ишканасынын №9-жол тейлөө ишканасы тарабынан Бишкек-Ош унаа жолунда аба-ырайынын шартына байланыштуу жолдорду кардан тазалоо жана инерттик материалдар менен толтуруу иштери такай жүргүзүлүүдө.

Жогорудагылардын негизинде жолдордун ашуу тилкелерине бара жаткан айдоочуларга жайкы дөңгөлөктөрдү кышкы дөңгөлөккө сөзсүз алмаштырууну, дөңгөлөктөрдүн чынжырчаларын жана күрөктөрүн кошо алып жүрүү сунуш этилет.

Алишер ТОКСОНБАЕВ, өз кабарчы