915 Бардыгы /

БАТКЕН. Жогорку Кеңештин төрагасы Нурланбек Шакиев Баткен облусуна жасаган жумушчу сапарынын алкагында чек ара жаңжалында жапа чегишкен Баткен районунун Капчыгай айылындагы калыбына келтирүү иштеринин жүрүшү менен жеринде кенен-чонон таанышты.

Ушул тапта Баткен жергесинде 40 тамдын пайдубалы түптөлсө, 20 үйдүн дубалдары дагы тургузулуп, курулуш иштери кызуу улантылууда.Бирок жергиликтүү тургундар жумуштардын жай жүрүп жаткандыгына аябай кабатырланышты. Ушундай эле курулуш иштери Кара-Бак айыл аймагынын Достук айылында дагы ырааттуу жүргүзүлүүдө. Ошентип, аймакта 58 үй жана социалдык мекемелердин имараты катарынан салынууда. Жалпысынан аталган эки айылда тең турак-жайлардан тышкары керектүү социалдык мекемелерди куруу жана жол, суу жана жарыктандыруу өңдүү инфратүзүм долбоорлору дагы каралган.

Шайлоочулар менен жолугушуусунун жүрүшүндө парламент спикери Нурланбек Шакиев Министрлер кабинетинин берген маалыматына карабастан жасалып жаткан иштерди жеринде өз көзү менен көрүү максатында гана келгендигин жашырган жок. Ал эми Баткен районунун акими Учкунбек Жоробаев Баткен облусун өнүктүрүү максатында каралган 500 миллион сомдун 125 миллион сому Баткен районуна бөлүнгөндүгүн ачыктады. Акырында Жогорку Кеңеш төрагасы жана депутаттары  «Достук» чек ара заставасында дагы болушту.

Алишер ТОКСОНБАЕВ, өз кабарчы