723 Бардыгы /

ОШ. Жогорку Кеңеште мамлекеттен бөлүнгөн акчаны бизнеске айландырып жатышкандыгы эми ачык айтылды. Тилекке каршы, Кыргыз-тажик чек арасындагы жаңжалда талкаланган Баткен облусундагы үйлөрдүн ордуна бир дагы жаңы турак жай курулуп бүтө элек, жергиликтүү калк дагыле чатырда жашап жаткан чагы.

Бул туурасында Жогорку Кеңештин депутаты Жанарбек Акаев парламентте билдирди. Анын айтымында, бийлик убадалаган жардамдар дарегине дээрлик жетпей жатат. Чатыры жабылып үйүнө кирген бир дагы киши жок.

-Мен Лейлек районуна барып келдим. Тургундар дагыле чатырда же боз үйдө эптеп жашап жатышат. Эң көп үйлөр талкаланган Арка-1 айылына болгону үч контейнер гана жеткирилиптир. Көпчүлүк үйлөрдүн фундаменти куюлган бойдон токтоп турат. Аны дагы курулуш компаниялары өзүнүн каражатына куруптур. “Өкмөттөн акча берилген жок!”- дешет алар. Биз бөлүп берип жаткан акчалардын баары кана? Элибизден чогулган 320 миллион сомдон ар бир үйгө жок дегенде бир-экимиллион сомдон берип турбайсыңарбы? Айласы куруганда чатырын жаап алышмак. «Көп акча түшүүдө, укмуш болуп жатат» деген жашоо жок экен ал жакта! — деп тызылдады Жогорку Кеңештин депутаты Жанарбек Акаев.

Ал эми Жогорку Кеңештин дагы бир депутаты Султанбай Айжигитов Баткенди калыбына келтирүү менен эч ким алектенбей, мамлекеттен бөлүнгөн акча бизнеске айландырылып жаткандыгын жар салды. Буга улай Жогорку Кеңештин дагы бир депутаты Камила Талиева курулуш иштерин подрядчылар субподрядчыларга берип, бири-бирине шылтап отурушкандыгын шардана кылды. Мындай пикирлерди төрага Нурланбек Шакиев дагы толук бойдон кубаттап, өткөн аптада өзү Баткенге барып келгендигин баса белгиледи.

– Чынында, курулуштун темпи өтө жай болуп жаткандыгына, элдин нааразычылыгы бар экендигине биз дагы күбө болдук. Ал боюнча министрлер кабинетинин төрагасына, ошондой эле президентке дагы ачык айттым, — деп агынан жарылды спикер Нурланбек Шакиев.

Белгилей кетээрибиз: буга дейре Каржы министрлиги Баткен облусун калыбына келтирүүгө 3 миллиард сом бөлүнгөндүгүн маалымдаган эле.

Алишер ТОКСОНБАЕВ, өз кабарчы