1,119 Бардыгы /

ЖАЛАЛ-АБАД. Чаткал районунун Айгыр-Жал айылындагы Исмаил уулу Матиш атындагы орто мектебинин спорттук залына аталган мектептин педагогикалык кеңешинин чечими менен Айгыр-Жал айылынан чыккан белгилүү спортчу, улуттук ордо оюнунун чыгааны Медетов Мейманкулдун ысмы салтанаттуу түрдө ыйгарылды.

Буга карата аталган мектепте маркумдун бир туугандары тарабынан салтанаттуу иш-чара уюштурулду. Иш-чаранын жүрүшүндө маркумдун бир туугандары жана санаалаштары жылуу сөздөр менен маркумду эскеришти. Ал эми бир тууган карындашы Сайкалбү Абдылдаева аталган мектептин алдыңкы окуучуларына Мейманкул Медетов атындагы акчалай колдоолорду көрсөтүп, бул жөрөлгө мындан ары жыл сайын улантыларын билдирди.

Кошумчалай кетсек, маркум Мейманкул Медетов ордо оюну боюнча облустук жана республикалык мелдештерде бир нече ирет жеңүүчү болуп, районго көп жолу намыс алып берген. Ал ордо оюнунун эрежелерин мыкты билип, жаштардын кызыгуусуна себепчи болгон.

Мейманкул Медетов 2022-жылдын июль айында автокырсыктан улам 65 жашында жарык дүйнө менен кош айтышкан.

Мухамедалы ЭШНАЗАРОВ, Чаткал району