1,719 Бардыгы /

ЖАЛАЛ-АБАД. Энергетиктердин кесиптик майрамынын алдында Базар-Коргон районундагы Ачы участкасы ачылып пайдаланууга берилди.

Аталган участок, райондун 5 айыл өкмөтүн электр энергиясы менен тейлейт. Жалпы 8150 абонент бар. Буга тоолуу Арсланбап, Кызыл-Үңкүр аймактары да кирет. Бул жердегилер 1968-жылы курулган тар, 3 бөлмөлүү имаратта иштеп келишкен. Авариялык абалдагы имаратта 32 кызматкер эмгектенчү. Жумуш ордулары тар, ошол эле учурда ар тарабынан жарака кетип, жараксыз абалда болуп келген.

Жалал-Абад электр тармактары ишканасы 2021-жылдагы планга киргизип, имарат жаңы курулуп, пайдаланууга берилди. Бул жергиликтүү энергетиктер үчүн кесиптик майрам алдында белек болду. Кызматкерлер эле эмес абоненттер үчүн дагы ыңгайлуу шарт жаратылды. Жалпы 8 бөлмөдөн турат. Андан сырткары адистердин кызматтык кийимдердерин алмаштыруучу жай да бар. Ошондой эле кызматтык унаа, электр жабдуулар турган атайын гараж, кампасы кошо салынган.

Ачылуу аземине энергетиканын облустагы, райондогу жетекчилери, жергиликтүү бийлик жана жашоочулар катышты.

Белгилей кетсек, 22-декабрь Энергетиктердин кесиптик майрамы. Майрам урматына арналган имарат кызматкерлер үчүн кубаныч болду.