1,071 Бардыгы /

Урматтуу Жалал-Абад облусунун тургундары!Сиздерди кирип келе жаткан жаңы 2023-жылыңыздар менен Кыргыз Республикасынын Президентинин Жалал-Абад облусундагы ыйгарым укуктуу өкүлүнүн аппаратынын жана жеке өзүмдүн атымдан чын дилимден куттуктайм!

Биз баарыбыз аруу тилек, илгери үмүт, бийик максаттар менен 2023-жылдын босогосун аттаганы турабыз. Жаңы жыл жалпыбыз үчүн жакшылыктардын жылы болсун. Ак сакалы жайкалган аталарыбыз, колунан берекеси төгүлгөн энелерибиз аман болсун!Келечектин ээлери — жаштарыбыздын бардык ой максаттары ишке ашсын. Үйүбүздүн куту — балдарыбыздын күлкүсү жаңырып турсун!

2022-жыл Жалал-Абад облусунда бир катар алгылыктуу жумуштар аткарылды. Атап айтсак, калк үчүн керектүү болгон социалдык объектилердин куруу, ири инвестициялык долбоорлордун башталышы,инфраструктура жаатындагы жумуштар арбын. Бул жылы президентибиздин тапшырмасына ылайык, облуста чакан ГЭСтерди куруу аракеттери колго алынды. Ал үчүн жалпы 23 долбоор даярдалып, азыркы учурда беш чакан ГЭСтин курулуш иштери жүрүүдө. Көп жылдардан бери курулушу аягына чекпай келе жаткан мектеп имараттарында жумуш жанданып, жыл ичинде төрт мектеп пайдаланууга берилди. Мындан сырткары Жалал-Абад облусу боюнча   27 мектепке чейинки билим берүү уюмдары колдонууга тапшырылды. Майлуу-Суу шаарындагы лампа заводун модернизациялоо үчүн республикалык бюджеттен каражат бөлүндү. Жалал-Абад шаарынын ортосунда жайгашкан тергөө абагын шаар сыртына жылдыруу жумуштары башталды. Сузак жана Ала-Бука районунунда күнүнө 100 тонна сүттү кайра иштетүүчү заводдор ишкер киргизилди.

Мына ушинтип 2022-жылы облус какынын түйшөлтүп келе жаткан эң орчундуу көйгөйлөрүн чечүүгө басым жасадык. Жыл башында президентибиздин тапшырмасына ылайык, облустун бардык район-шаарларындагы жашоочулар менен жолушуулар өткөрүлдү. Анда жалпы миңден ашуу ар түрдүү көйгөйлөр көтөрүлгөн. Жыл ичинде мына ушул айтылган маселелерди жөнгө салууга да басым жасалды. Алардан жергилитктүү маанидеги көйгөйлөрдү ыкчам чечүү аракети колго алынды. Ал эми республикалык мааниде каралуучу жумуштар боюнча жогорку органдарга маалымадалды. Жалпы жонунан алганда эл менен болгон жолугушуулардын алкагында көтөрүлгөн маселелердин басымдуу бөлүгү мыйзам чегинде каралып, чечилди. Айрымдары бүгүнкү күнгө чейин көзөмөлдө.

Жалал-Абад облусунда өткүп бара жаткан 2022-жыл көптөгөн курулуштар, бир катар долбоорлордун башталыш жылы болду десек жаңылышпайбыз.  Келээрки 2023-жылы мына ушул аракеттерибизди улантып, калк үчүн пайдалуу болгон демилгелерибизди аягына чыгарабыз деген үмүттөбүз. Ири долбоорлорду өз нугунда, бардык талаптар сакталган шартта сапаттуу бүткөрүүгө сөзсүз түрдө убакыт талап кылынат эмеспи.

Кадырлуу Жалал-Абад облусунун тургундары!

Келе жаткан 2023-жылында да чоң-чоң долбоорлордун аткарылышы күтүлүүдө. Буюрса Жаңы-жылдагы иштерибиздин жыйынтыгына кезинде сиздер дагы  күбө болосуздар. Урматтуу замандаштарым! Өтүп бара жаткан жылдагы ийгилигибиз бул – мамлекетибиздин тынчтыгы, элибиздин биримдиги, ынтымагы болуп эсептелет. Жаңы жыл элибизге тынчтыктын, ынтымактын, биримдиктин, токчулуктун, молчулуктун, ынтымак-ырашкердиктин жылы болсун!

Эл ичинде жакшылык кылып, илим-билимге, ыйманга умтулган жаштарыбыздын катары арбысын! Жаӊы-жылда үй-бүлө, ага-тууган, эли журтубуз менен түгөл бололу!

Дагы бир жолу жаңы жылыңыздар менен!

Абсаттар Сыргабаев,

Кыргыз Республикасынын Президентинин Жалал-Абад облусундагы ыйгарым укуктуу өкүлү