1,404 Бардыгы /

ЖАЛАЛ-АБАД. ОИИБдин имаратында ички иштер органдарынын ардагери, милициянын отставкадагы полковниги Ибрагим Шатманалиевге ИИМдин “Кыргыз милициясына 95 жыл” юбилейлик медалы, куттуктоо баракчасы тапшырылып, калпак, чепкен кийгизилди.

Жалал-Абад ОИИБдин басма сөз кызматы билдиргендей, сыйлоо аземине Жалал-Абад ОИИБдин начальниги, милициянын полковниги Жеңишбек Абитов, ОИИБдин ардагерлер кеңешинин төрагасы, милициянын отставкадагы полковниги Капарбек Исаков, ОИИБдин бөлүм башчылары катышышты. Жеңишбек Абитов ардагерди 60 жашка толушу менен куттуктап, бекем ден соолук каалады. Анын милицияда иштеген жылдары топтогон тажрыйбасын жаш кызматкерлер менен бөлүшүп, ар дайым сый-урматтын үстүндө жүрүүсүнө тилектештигин билдирди.

Өз кезегинде Ибрагим Шатманалиев Жалал-Абад ОИИБдин жетекчилигине ыраазычылык билдирип, өздүк курам арасында жоготуулар болбой, иштеринде ийгиликтер коштоп жүрүүсүн тилеп, ак батасын берди. Милициянын отставкадагы полковниги Ибрагим Шатманалиев ички иштер органдарында 1991-жылдан тартып кызмат өтөп баштаган. 2010-2015-жылдары Жалал-Абад ОИИБдин коомдук коопсуздук кызматынын начальниги, 2015-2017-жылдары Жалал-Абад ОИИБдин начальнигинин кызмат иштери боюнча орун басары болгон. Андан соң 2017-2018-жылдары Талас ОИИБдин начальнигинин кызмат иштери боюнча орун басарлыгын аркалап, ардактуу эс алууга чыккан.