1,179 Бардыгы /

БИШКЕК. Жогорку Кеңештин төрагасы Нурланбек Шакиев апрель айынын башында республикабыздын маданият, маалымат, спорт жана жаштар саясаты министри Алтынбек Максутовдун коштоосунда мамлекеттик жана саясий ишмер Исхак Раззаковдун үй-музейине атайылап баш бакты.

Айтмакчы, 2005-жылы 85 жылдыгына карата музей катары ачылган үйдө Исхак Раззаков өзү 1950-1961-жылдары жашаган. Анткени, дал ошол учурда ал Кыргыз Коммунисттик партиясынын Борбордук комитетинин биринчи катчысы эле. Ушул тапта бул музейде улуу инсандын өмүр жолун чагылдырган баалуу маалыматтар, архивдик материалдар, колдонгон буюм-тейимдери жана эмеректери сакталган. Ошондой эле маданий жайга келгендер Кыргыз тарыхына, Исхак Раззаков мамлекетти башкарып турган учурда жүзөгө ашырылган Чоң Чүй каналынын курулушу өңдүү ири долбоорлорго байланышкан уникалдуу фото-материалдар менен кенен-чонон тааныша алышат. Мындан тышкары аталган музейден мамлекеттик ишмердин өзү жазган күндөлүгүн дагы көрүүгө болот.

Үй-музей менен таанышып чыккан Жогорку Кеңештин төрагасы Нурланбек Шакиев даңазалуу мамлекеттик ишмердин жасаган иштери жалпы Кыргыз коомчулугуна үлгү экендигин баса белгиледи: – Өлкөбүздүн тарыхында ушундай улуу инсандар жашап өткөндүгүн дүйнө эли дагы сөзсүз билиши кажет! Андыктан, чет жактардан келген жогорку даражалуу конокторду дагы ушул музейге сөзсүз ээрчитип келип, Исхак Раззаковдун өмүр жолу жана Кыргыз мамлекетинин өнүгүшүнө кошкон салымы тууралуу маалыматтар менен тааныштырууга милдеткербиз!

Соңунда Кыргыз парламентинин спикери Нурланбек Шакиев маанилүү маданий жайга мамлекеттик ишмердин портретин белекке тартуулап, Ардактуу меймандар китебине өзүнүн каалоо-тилектерин дагы жазып калтырды.

          Алишер ТОКСОНБАЕВ, өз кабарчы