1,128 Бардыгы /

ЖАЛАЛ-АБАД. Учурда Жалал-Абад шаарындагы Пушкин көчөсүн реконструкциялоо иштери башталып, ал көчөнүн айрым бөлүгүндө унаа жүрүшү убактылуу жабылды.

Жалал-Абад шаарындагыПушкин көчөсүндө 2018-2019-жылдары кеңейтүү жүргүзүлүп, реконструкцияланган. Тагыраагы кеңейтилген аянттарына асфальт төшөлүп, жол жээктерине латок, жөө жүрүүчү жайлар курулган.

“Пушкин көчөсүнүн Ж.Бакиев көчөсүнөн Достаевский көчөсүнө чейинки аралык 2018-жылы биринчи этап менен жергиликтүү бийликтин 19 миллион 600 миң акча каражатынан оңдоп-түзөөдөн өткөн. Экинчи этап менен ошол Достаевский көчөдөн облустук ооруканага чейин 19 миллион 807 миң сомго реконструкция болгон. Бирок бүгүнкү күндө Пушкин көчөгө кайрадан реконструкция жүргүзүү талап кылынып, иш башталып турат. Себеби мурда кеңейтилген аянтына гана асфальт төшөлгөндүктөн жана канализация түтүктөрү өткөрүлгөндүктөн асфальт чөгүп кеткен”- деп билдирди Жалал-Абад шаардык мэриясынын курулуш-транспорт жана коммуникация боюнча башкы адиси Дастан Кошназаров.

Анын айтымында бүгүн кайрадан аткарылып жаткан иштерге Жалал-Абад шаарын өнүктүрүүгө бөлүнгөн 2 миллиард каражаттан каражат каралган. Учурда эски асфальтты сыйруу иштери жүргүзүлүп жатат. Негизи Пушкин көчөсү жалпысынан 2 чарчы метрге чукул. Аны реконструкциялоого тендер жүргүзүлүп, жалпы 70 миллион 364 миң каражат сарпталат. Адистердин айтымында асфальт төшөгөн фирманын жоопкерчилиги келишимдин негизинде 3 жылдык мөөнөткө түзүлөт. Эгер үч жыл ичинде жол чөгүп кеткен болсо, ошол аткаруучу фирма өз эсебинен милдеттүү түрдө кайра жолду куруп, калыбына келтирүүгө милдеттүү. Анткен менен учурда бул көчөнү курганга 3 жылдан ашкан. Андыктан фирмага доомат жок экен.

Мындан сырткары бул жылы Жалал-Абад шаарындагы Ленин, Б. Осмонов, Спитник кичи шаарчасындагы Манас, Индустриальный көчөлөрү да Жалал-Абад шаарын өнүктүрүүгө бөлүнгөн 2 миллиард каражаттын эсебинен реконструкцияланат. 

Аэлина АЛИШЕРОВА, “АЙМАК”