1,113 Бардыгы /

ЖАЛАЛ-АБАД. Жалал-Абад шаарындагы Тукубай Тайгараев аймактык башкаруусундагы Сатыбалды Жээнбеков айылына “Жалал-Абад сууканал” башкармалыгы тарабынан таза суу чыгарылды.

Жалал-Абад шаардык мэриясынын маалымат борбору билдиргендей, шаар бийлиги аталган айылды ичүүчү суу менен камсыздоо үчүн кошумча резервуар жана скважина куруп берген. Учурда таза суу 130 метр тереңдиктен насостун жардамында чыгарылууда. Аталган айылдын жашоочулары буга чейин атайын суу ташуучу унаалар менен кудуктарына суу толтуруп, күнүмдүк керектөөсүнө пайдаланып келчү. Эми алар бул түйшүктөн арылып, акча каражатында үнөмдөй башташты.

Белгилей кетсек, Жалал-Абад шаарында Европа өнүктүрүү жана реконструкциялоо банкынын каржылоосу менен “Жалал-Абад шаарынын суу жана саркынды суу тутумун реабилитациялоо” долбоорунун экинчи фазасы ишке ашырылып жатат. Жалпысынан экинчи фаза менен шаарда 8 чакырым саркынды суу түтүктөрү жана 40 чакырым суу түтүктөрү тартылат. Ошондой эле №2 саркынды сууларды кабыл алуу жайы жаңыланат. Ал эми алдыда шаар бийлигинин тапшырмасы жана элдин суроо-талабы менен “Жалал-Абад сууканал” башкармалыгы Тайгараев аймактык башкаруусундагы таза суусу жок 7 айылга суу чыгарууну пландап жатат.