765 Бардыгы /

          БАТКЕН. Баткен облусунда климаттын ыкчам өзгөрүүсүнө байланыштуу ири долбоорлорду жүзөгө ашыруу пландаштырылууда. Мындай зор мүмкүнчүлүк президенттин Баткен облусундагы өкүлүнүн орун басары Тимур Мадяров баштаган топтун KOICA уюмунун климат департаментинин директору Жихи Ким жана БУУнун өнүктүрүү программасынын Кыргызстандагы кеңсесинин экология, климаттын өзгөрүүсү жана өзгөчө кырдаалдар бөлүмүнүн башчысы Лира Жолдубаевалар жетектеген делегация менен жолугушуусунда дагы кеё-кесири талкууланды.

          Ошентип, бул кездешүүнүн маалында “Жашыл Климат” фондунун алкагында жүзөгө ашырылуучу долбоор туурасында такай сөз жүрдү. Белгилей кетчү жагдай:  БУУнун өнүктүрүү программасы жана дагы KOICA уюмунун биргелешкен аракети аркасында өрүкзарлуу Баткен облусунун аймагында климаттын өзгөрүүсүнө байланыштуу ири долбоорду жүзөгө ашыруу аракеттери жасалууда. Аталган долбоордун алкагында аймакка 50 миллион долларга чейин каражат сарпталмакчы. Бул долбоорго Баткен жана Лейлек районунун бир катар айыл өкмөттөрү пилоттук негизде гана тандалууда. Долбоордун алкагында аталган аймактарда суу таңкыстык көйгөйүн жеңилдетүү маселелерине өзгөчө көңүл бурулат. Сууну үнөмдүү пайдалануу, тамчылатып сугаруу ыкмасын жайылтуу, суу жетпеген дың жерлерди өздөштүрүү дагы дыкаат каралууда.

          Адистердин айтымында климаттын өзгөрүүсү менен жыл сайын Баткен жергесинде сугат суунун азайуусу дагы өзгөчө байкалууда. Бул глобалдык маселенин кесепеттерин алдын алуу максатында, “Жашыл Климат” фонду менен кызматташуу аркылуу кечиктирилгис чараларды көрүү жагы баса белгиленди. Ушундан улам ушул тапта бул өёүттө бир катар иш чаралар планы боюнча билдирменин үстүндө иш алып барылууда.           Президенттин Баткен облусундагы өкүлүнүн орун басары Тимур Мадяровөз сөзүндө президенттин “Экологиялык коопсуздукту жана климаттык туруктуулукту камсыз кылуу боюнча чаралар жөнүндө” Жарлыгына ылайык, Кыргызстандын президентинин Баткен облусундагы ыйгарым укуктуу өкүлчүлүгү, Айыл чарба министрлиги жана Жаратылыш ресурстары, экология жана техникалык көзөмөл министрлиги менен биргеликте, аталган долбоорду жүзөгө ийгиликтүү ашырууда максаттуу иш алып барышаарын катуу убадалады.

          Белгилей кетчү жагдай: мындай климаттык туруктуулукту камсыз кылуу боюнча долбоор буга дейре БУУнун Өнүктүрүү Программасы тарабынан Баткен районунун Самаркандек айыл өкмөтүндө, Ас-Сафа кайрымдуулук уюму тарабынан Баткен районунун Кара-Бак айыл өкмөтүндө ийгиликтүү жүзөгө ашырылган эле.

Алишер ТОКСОНБАЕВ, өз кабарчы