1,419 Бардыгы /

          ЖАЛАЛ-АБАД. Жалал-Абад облусунун Чаткал районундагы төрт – Кара-Булак, Айгыр-Жал, Бел-Капчыгай жана Каныш-Кыя айылдарынын тургундары нааразылык акциясына чыгышты. Алар Каныш-Кыядагы акимчиликтин имаратынын алдына чогулушуп, Чаткал районунун акими Алтынбек Сеңирбаевдин токтоосуз кызматтан кетишин дагы талап кылышты.

          Жергиликтүү тургундар «Аташ-Чапкан» компаниясынын Чаткал районунда кен казышына каршы экендиктерин, эгерде чалгындоо жана кен казуу иштери башталса, төрт айылдын айдоо жерлерине жана сууга зыяны тийе тургандыгын айтышууда. Мисалы, Алтынбек Сеңирбаев «Аташ-Чапкан» ишканасы Түлөберди участкасынан 10 гектар жерди чалгындоо жана иштетүү үчүн лицензия алгандыгын билдирди. Айыл тургундары сугат суу маселесине байланыштуу нааразылык билдирип чыккандыктан, «Аташ-Чапкан» ишин убактылуу токтоткондугун ачыктады.  Буга дейре Чаткалда алтын казган «Эти Бакыр Терексай» жана «Вертекс Голд Компаниге» байланышкан чыр-чатак жана сын-доомат калк арасында чоң нааразычылык жараткан.

          Чаткал районунда чачыранды алтын казып жаткан компаниялардын дээрлик баардыгы пайдасынан, кирешесинен жана сатуудан салык төлөбөй келатышат. Анда лицензиялар колдон колго өткөн, айрым учурда ээси ким экени дагы белгисиз учурлар бар экендиги аныкталган. Мындан тышкар тоолуу өрөөндө токой, тал-терек кыйылып, дарыя-суулардын нугу бузулгандыктан жана айлана-чөйрө кайра калыбына келтирилбегендиктен, чачыранды алтын казууга мораторий киргизүү талабы байма-бай көтөрүлүп келатат.

Алишер ТОКСОНБАЕВ, өз кабарчы