828 Бардыгы /

ЖАЛАЛ-АБАД. Эсиңиздедир. Былтыркы кычырыган кышта Жалал-Абад облусуна караштуу Майлуу-Суу шаары суусуз, жылуулуксуз жана электр энергиясыз калган эле.

         Ошол себептүү Кыргыз Өкмөтүнүн төрагасынын орун басары Бакыт Төрөбаев Майлуу-Суу шаарынын алдыдагы кышка карата даярдыгын дыкаат текшерди. Вице-премьер-министр «Кыргызтеплоэнерго» мамлекеттик ишканасына таандык № 1 – жана № 3- отказандарына атайылап баш бакты.  Анткени, бул ишканаларга жапжаңы суу өткөргүчтөр орнотулуп, ал эми № 3-отказанга артезиан суусу дагы жеткирилди. Бул аркылуу суу түтүктөрүнө суунун агызылышы тыкыр текшерилди. Ошентип капиталдык ремонтту сентябрга карата аяктоо пландалууда. Кыскасы, суу өткөргүчтөрдү жана № 3-отказанды толук кандуу монтаждоого мамлекеттик бюджеттен 2,7 миллион сом бөлүнгөн.

         Эске сала кетчү жагдай: 2023-жылдын 13-январында катуу сууктун кесепетинен Майлуу-Суу шааарынын суу-канализация чарбасынын суу түтүктөрү тоңуп калган. Мунун айынан шаардыктар ичилүүчү суусуз, электр энергиясыз жана дагы жылуулуксуз калышкан.

Алишер ТОКСОНБАЕВ, өз кабарчы