882 Бардыгы /

         Кыргыз Республикасынын  УКМКсына караштуу мамлекеттик  Чек ара кызматынын маалымат жана коммуникация башкармалыгынын маалыматына караганда, үстүбүздөгү жылдын 1-сентябрынан баштап Кыргыз Республикасынын жана Өзбекстан Республикасынын жарандары жалпы жарандык паспорт (чет элдик) менен катар эле  ID-карта менен дагы Кыргыз-Өзбек мамлекеттик чек арасын  кесип өтө алышат.

           Ошентип, 2006-жылдын октябрында кол коюлган жарандардын өз ара каттамы жөнүндөгү Өкмөттөр аралык макулдашууга тиешелүү өзгөрүүлөр жана толуктоолор киргизилди:

           – 2023-жылдын 1-сентябрында саат 00:00дон баштап Кыргызстандын жана Өзбекстандын жарандары ID-карталарды (Кыргызстандын жарандары үчүн 2004-жыл жана 2017-жыл үлгүсүндөгү ID-карталары). же эки мамлекеттин аймагына кирүү, чыгуу, болуу жана ары-бери жүрүү үчүн чет элдик паспортту дагы колдоно алышат;

            – Кыргыз-Өзбек мамлекеттик чек ара тилкесинде жайгашкан   өткөрүү жайларында гана мамлекеттик чек араны кесип өтүүгө,  же Кыргыз Республикасынан Өзбекстан Республикасына жана кайра артка түз аба каттамы менен жүрүүдө ID-карта менен чек араны кесип өтө алышат.

           Ал эми үчүнчү өлкөлөргө чыгуу  үчүн эки өлкөнүн  жарандарынын тең  жанында жалпы жарандык (чет элдик) паспорттору, же мамлекеттер аралык макулдашууларда аныкталган башка каттам документтери болушу дагы зарылдыгын Кыргыз Республикасынын УКМКсына караштуу Мамлекеттик  Чек ара кызматы баса белгилейт.

Алишер ТОКСОНБАЕВ, өз кабарчы