618 Бардыгы /

          ОШ. Мындан ары Ош, Жалал-Абад жана Баткен облустарында мамлекеттик дарыканалар ачылат. Бул туурасында Саламаттык сактоо министр Алымкадыр Бейшеналиев Ош облусундагы саламаттык сактоо уюмдарынын иши менен таанышкандан кийин шардана кылды.

          Кыргыз Өкмөтүнүн мүчөсү Алымкадыр Бейшеналиевдин айтымында, ал Ош облусуна жасаган жумушчу сапарынын алкагында, Ош шаарынын жана Ош облусунун саламаттык сактоо мекемелеринин ал-акыбалы менен жеринде таанышты. Ал калкты сапаттуу жана жеткиликтүү арзан баадагы дары-дармектер менен толук кандуу камсыздоо максатында мамлекеттик саламаттык сактоо мекемелеринде мамлекеттик дарыканаларды ачуу – калктын көйгөйүн чечүүнүн бир жолу экендигин баса белгиледи.

          Ошентип, Саламаттык сактоо министр Алымкадыр Бейшеналиев сапарынын жыйынтыгында Ош шаарына 2 дарыкана түйүнүн, Ош облусунун Кара-Суу, Ноокат, Кара-Кулжа, Өзгөн, Араван райондорунун борборлорунда бирден мамлекеттик дарыкана, Жалал-Абад шаарына 1 дарыкана, Жалал-Абад облусунун Базар-Коргон, Токтогул, Ноокен райондоруна, Кочкор-Ата шаарына бирден мамлекеттик дарыкана, ошондой эле Баткен облусунун Баткен, Кадамжай, Лейлек райондоруна, Кызыл-Кыя, Сүлүктү шаарларына бирден мамлекеттик дарыкана ачуу боюнча тапшырмаларды берди. Ал ошолндой эле саламаттык сактоо мекемелеринин жетекчилерин калктын көйгөйүн чече тургандай артыкчылыктуу багыт менен иш алып барууга катуу үндөдү.

Алишер ТОКСОНБАЕВ, өз кабарчы