213 Бардыгы /

        Ош шаарында жаңы салынуучу муниципалдык базар Осмонов көчөсүндөгү “Мегаполис” соода борборунун маңдайындагы жерге гана курулат. Мэриянын кабарлашынча, базар эки ай аралыгында сөзсүз түрдө бүткөрүлөт. Ага дейре азыркы базар кадимкидей эле иштеп турат.

        Ошентип, ушул жылдын 22-июлунда Ош шаарынын мэри Бакыт Жетигенов баштаган жетекчилер базардын көчүрүлүшүнө нааразыланган соодагерлер менен өз ара жолугушту. Анда соодагерлер убактылуу иштеп жатышкан көпүрөлөрдү калтырып туруу жана базарды көчүрүү убактысын дагы узартуу талабын айтышты. Ал эми Ош шаарынын мэри көпүрөлөрдүн баары катарынан алынаарын, соодагерлер жаңы базарга бир-эки айдын аралыгында көчүшү абзел экендигин дыкаат түшүндүрдү. Соодагерлер жаңы базар салынуучу жер ыңгайсыз экендигин айтышып, каршы болушкан. Буга дейре Ош шаарынын мэриясы борбордук базар Жапалак айылындагы Көкүмбий көчөсүнө көчүрүлө тургандыгын шардана кылган эле.

        Баса, Ош шаарында сел каптаган борбордук базарды башка жакка көчүрүүнүн мөөнөтүн узартып берүүнү бийликтен суранып соодагерлер үч күндөн бери чогулуп жатышат. Анткени, ушул жылдын 14-июлунда катуу төккөн жамгырдан кийин Ак-Буура дарыясы катуу кирген. Буга улай кыян жүрүп, Оштогу борбордук базарды жана дагы чет жакадагы айылдарды дагы катарынан сел каптаган. Табигый кырсыктан беш киши каза таап, бир нече машинени сел агызып, үйлөр, көпүрөлөр жана дагы жолдор жарактан чыккан. Соодагерлер дагы абдан чоң чыгымга учурашкан.

Алишер ТОКСОНБАЕВ, өз кабарчы