18 Бардыгы /

Акыркы маалда күн ыраса жылыды. Ошого жараша дагы убакыт ого бетер кеңейди. Ошондуктан, Кыргызстандын Түштүк башкалаасында таң аткандан каш карайганга дейре баш көтөрбөстөн иштеп жатышкан азаматтар калааны чекесинен көрктөндүрүп, а түгүл ар түрдүү көчөттөрдү шаардын баардык көчөлөрүнө дагы тынымсыз олтургузуп жатышат.

          Адылбек ОМОРКУЛОВ, «Оштогу көрктөндүрүү жана жашылдандыруу чарба комбинаты»  муниципалдык ишканасынын бак-дарак тегиздөөчүсү:

– Мен «Оштогу көрктөндүрүү жана жашылдандыруу чарба комбинаты»  муниципалдык ишканасында дээрлик 42 жылдан бери үзгүлтүксүз эмгектенип гана келатамын. Кудайга шүгүр! Соңку кезде маянабыз айтаарлык даражада жогорулады. Ошого карабастан, негедир биздин тармакка жаштар дээрлик жолошпойт! Жашырып не. Биздин улан-кыздарыбыз жалаң папке көтөргөндү, адегенде эле чооң кызматтарды эңсеп, баш оорутпастан жылуу-жумшак кеңседе олтурганды өтө жакшы көрүшөт экен.

          Биз билгенден Жаанбай ТУРСУНКУЛОВ көптөгөн жылдар бою «Оштогу көрктөндүрүү жана жашылдандыруу чарба комбинаты»  муниципалдык ишканасында башкы агрономдук вазийпаны абийирдүү аркалаган. Эң башкысы: артынан бир дагы жаман сөз ээрчиткен жок! Соңку кезде аталган ишканада агротехник кызматын деле абийирдүү аркалап, аталган топту мыкты жетектеп жаткан чагы.

 Ош шаарынын мэри Жеңишбек ТОКТОРБАЕВдин акылман жетекчилигинин астында калаабыздын булуң-бурчунда 12 миң түп бак-дарак, анан карагай катарынан эгилди, – деди «Оштогу көрктөндүрүү жана жашылдандыруу чарба комбинаты»  муниципалдык ишканасынын агротехниги Жаанбай ТУРСУНКУЛОВ.

– Фарзиция, казильник, батраник, межавельник ушул тапта 20 миң метр квадрат аянтка олтургузулду. Көз тийбесин! Биздин бригадабызда Адылбек Оморкулов, Асылбек Эсенбаев, Жаныш Кошоев өңдөнгөн азаматтар абдан үлгүлүү эмгектенип жатышат.  

Ош шаарынын мэри Женишбек Токторбаевдин протоколдук тапшырмасына ылайык шаарыбызды мындан ары дагы көрктөндүрүү жана жашылдандыруу иштерин жакшыртуу максатында Санабар Бахапова көчөсүндө “Оштогу көрктөндүрүү жана жашылдандыруу чарба комбинаты” муниципалдык ишканасы үчүн жаңы күнөскана курулуп жаткан чагы, – деп кубандарды «Оштогу көрктөндүрүү жана жашылдандыруу чарба комбинаты»  муниципалдык ишканасынын директору Азамат СОВЕТБЕК уулу.

          Административдк-Аймактык реформанын негизинде Ош шаарына Кара-Суу райоунун Кызыл-Кыштак жана Төлөйкөн айыл өкмөттөрү, Папан айыл өкмөтүнүн Ак-Буура-1, 2, 3, 4 тилкелери, ошондой эле Нариман айыл өкмөтүнүн Жаңы-Маале, Жим, Жийделик, Шарк айыл өкөмтүнүн Имам-Ата кыштактары кошулгандан бери «Оштогу көрктөндүрүү жана жашылдандыруу чарба комбинаты»  муниципалдык ишканасынын түйшүгү ушл тапта ого бетер көбөйдү. Не демекчибиз? Ишиңер ар дайым илгери болсун, азаматтар!

Алишер ТОКСОНБАЕВ, өз кабарчы