51 Бардыгы /

Бүгүн, 5-декабрда Кыргыз Республикасынын Министрлер Кабинетинин Төрагасы-Президенттин Администрациясынын Жетекчиси Адылбек Касымалиев жумуш сапарынын алкагында Манас шаарындагы бир катар ири социалдык объектилердин курулушунун жүрүшү менен таанышты.
Атап айтканда, Министрлер Кабинетинин башчысы 5200 орундуу Спорт сарайынын курулушунун жүрүшү менен таанышты. Объект заманбап инженердик-курулуш талаптарына ылайык курулууда. Спорт комплексинде бассейн, спорттук аянтчалар, конференц-зал, машыгуу жана массаж кабинеттери, душ жана санитардык түйүндөр, көмөкчү бөлмөлөр, фудкорттор, трибуналар, гимнастика залы каралган.
Объект 2026-жылдын августунда бүткөрүлүшү күтүлүүдө. Андан ары Адылбек Касымалиев жүрөк-кан тамыр хирургиясы боюнча түштүк аймактык илимий борборунун курулушунун жүрүшүн көрдү. Эл аралык стандарттарга жооп берген заманбап медициналык комплекс 250 орунга ылайыкташтырылат. Курулуш иштери 2026-жылдын аягында бүтөт деп күтүлүүдө. Илимий борбор калк үчүн жогорку технологиялуу кардиохирургиялык жардамдын жеткиликтүүлүгүн жогорулатат.
Сапардын алкагында Министрлер Кабинетинин Төрагасы президенттик “Акылман” лицейинин курулушунун жүрүшү менен таанышты. Долбоорго үч кабаттуу окуу корпусу, 420 орундуу окуучулар үчүн жатакана жана педагогдорду жеткиликтүү турак жай менен камсыз кылуу үчүн 25 батирлүү турак жай кирет. Курулуштун аякташы 2026-жылдын сентябрь айына пландаштырылган.
Министрлер Кабинетинин башчысы Адылбек Касымалиев курулуш иштеринин графигин сактоону жана сапаттуу аткарылышын камсыздоону тапшырып, региондорду өнүктүрүү жана социалдык кызматтардын сапатын жогорулатуу өкмөттүн негизги приоритеттеринин бири бойдон кала берерин баса белгиледи.