3 Бардыгы /

 Тогуз-Торо районунун түзүлгөндүгүнүн 90 жылдык мааракеси салтанаттуу белгиленди.

Иш-чарага Кыргыз Республикасынын Жогорку Кеңешинин Төрагасы Марлен Маматалиев, Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев, жергиликтүү бийлик өкүлдөрү жана район тургундары катышты.

Мааракенин алкагында райондун тарыхын, маданиятын жана жетишкендиктерин даңазалаган концерттик программа тартууланды.

Салтанатта облус башчысы Тилек Текебаев район элин 90 жылдык мааракеси менен куттуктап, Тогуз-Торонун тарыхый мурасына, эмгекчил калкына жана өлкөнүн өнүгүүсүндөгү ордуна токтолду.

Ал Тогуз-Торо жаратылыш ресурстарына бай, эли эмгекчил жана меймандос жер экенин белгилеп, райондун түптөлүшүнө жана өнүгүүсүнө салым кошкон инсандардын эмгеги кийинки муундар үчүн үлгү болуп каларын айтты.

Ошондой эле өлкөдө ишке ашырылып жаткан ири инфраструктуралык долбоорлор райондун транспорттук, энергетикалык жана логистикалык мүмкүнчүлүктөрүн кеңейтүүгө шарт түзүп жатканы белгиленди. Алардын катарында Кытай–Кыргызстан–Өзбекстан темир жолунун курулушу, Жалал-Абад–Балыкчы альтернативдүү автожолу жана Казарман ГЭСтер каскады өзгөчө мааниге ээ экенин айтты.

Өкүл аталган долбоорлор Тогуз-Торонун географиялык жайгашуусун натыйжалуу пайдаланууга, транспорттук жана экономикалык мүмкүнчүлүктөрүн кеңейтүүгө, өлкөнүн узак мөөнөттүү өнүгүүсүнө өбөлгө түзөөрүн кошумчалады.

Тогуз-Торо районунун 90 жылдык мааракесине карата жалпысынан 90 иш-чара өткөрүлдү. Алардын катарында маданий жана спорттук иш-чаралар, акындардын айтышы жана ар кандай сынактар уюштурулуп, ички жолдор курулуп, социалдык объектилер пайдаланууга берилди.

Белгилей кетсек, Тогуз-Торо районунда учурда 27 миң 600гө жакын калк жашайт.