927 Бардыгы /

Улуттук коопсуздук боюнча мамлдекеттик кызмат (УКМК) «Азаттыктын» журналисти иликтеп чыккан мыйзамсыз коррупциялык иштерди иликтеп, ачыкка чыгаруунун ордуна, тескерисинче, ишти башка нукка буруп, анын өзүн күнөөлүү кылып көрсөткүсү келип жатат.

Мындай пикирин Конституциялык соттун мурдагы судьясы Клара Сооронкулова «Азаттыктын» «Ыңгайсыз суроолор» программасында билдирди:

«Эгер УКМК өздөрүнүн алдына коюлган ишти – иликтөөдө айтылган мыйзамсыз, коррупциялык иштердин жок экенин аныктап, ал тууралуу маалыматтарды жокко чыгарып, анан гана «журналист жок маалыматтарды бериш үчүн акча алган экен» деп чыгарса түшүнүктүү болмок. Бул жолу алар тескерисинче кетишти. Коррупциялык иштерди эмес, аларды айтып чыккан журналисттин ишине киришип, чоң олжо тапкансып, «акча алганын таап чыктык» деп мактанып жатышат».

Сооронкулова атайын кызмат «Мыйзамсыз баюу» беренеси менен кылмыш ишин козгоп, иликтөөдө аталган адамдардын байлыгын текшерүүгө тийиш деп эсептейт.

2-июнда кытай жараны Айеркен Саймаитинин Кыргызстандын бажы тармагындагы айрым мамлекеттик кызматкерлер байланышкан коррупция тууралуу «Азаттыкка» айткан маалыматтарын иликтеш үчүн Жогорку Кеңеште түзүлгөн убактылуу комиссиянын отуруму өткөн. Анда УКМКнын Тергөө башкармалыгынын башчысы Самидин уулу Сагынбек «Кытайдын жараны Айеркен Саймаити «Азаттыктын» журналисттерине финансылык каражат берген» деген көрсөтмөлөр болгонун билдирген. «Айеркен Саймаитинин «Азаттыктын» журналистине акча бергенин өзүнөн укканбыз» деген эки күбөнүн видео көрсөтмөсү көрсөтүлгөн. УКМКнын бул аракетин Жогорку Кеңештин айрым депутаттары, жарандык активисттер айыптап чыгышты.

Ал эми «Эркин Европа/Азаттык» радиосунун президенти Жейми Флай «”Азаттыктын” кабарчысы акча алган» деген маалыматты «журналисттерди каралоо» деп баалады.

www.