882 Бардыгы /

Өткөн жылдын беш айына салыштырмалуу быйылкы жылдын беш айында ымыркайлардын өлүмү отуз бешке кыскарган.

Бул тууралуу  областтык үй-бүлөлүк медицина борборунун директорунун орун басары  Кадича Пратова калктын саламаттыгын сактоо боюнча координациялык комиссиянын онлайн жыйынында билдирди.

 “2019-жылдын беш айына караганда 2020-жылдын беш айынын жыйынтыгында төрөттүн саны 479га азайды. Ал эми балдардын өлүмү былтыры 168 болсо, быйыл 133 болгон. Ала-Бука, Сузак райондорунда, Таш-Көмүр, Кара-Көл шаарларында ымыркай балдардын өлүмү бир аз көбөйгөн. Ымыркайлар ара төрөлүп, алардын өлүмү төрөт үйлөрүндө көп болууда. Буга энелердин каны аздыгы, ден соолугуна жакшы кам көрбөгөндүгү да себептүү. Ошондуктан биз энелердин саламаттыгын сактоо максатында аларга акысыз полис алып берип, камсыздандырып коюудабыз”,-дейт К.Пратова.

Облус аймагында быйылкы жылы беш ай ичинде 11 080 төрөт кабыл алынып, 3 эненин өлүмү катталган.

25-июнь күнү облуст аймагындагы калктын саламаттыгын сактоо боюнча координациялык комиссиянын онлайн жыйыны өттү. Анда ВИЧ/СПИД, энелер жана ымыркайлардын өлүмү боюнча үч маселе талкууланды.

“Аймак”