1,041 Бардыгы /

ЖАЛАЛ-АБАД. Бүгүн, 3-декабрь Майыптардын эл аралык күнүнө карата Кыргыз Республикасынын Президентинин Жалал-Абад облусундагы ыйгарым укуктуу өкүлү Абсаттар Сыргабаев шаардагы “Кыргыз азиздер жана дүлөйлөр коомунун Жалал-Абад окуу өндүрүштүк ишканасында” эмгектенген кызматкерлерден кабар алды. Бул тууралуу өкүлдүн басма сөз кызматы маалымдады.

Азыркы учурда аталган коомдун мүчөлүгүнө угуу, көрүү мүмкүнчүлүгүнөн ажыраган 180 адам катталган. Алардан 37си жумуш менен камсыздалып, басымдуу тигүү тармагында эмгектенишет.

Облус башчысы мекеменин ишмердүүлүгү менен таанышып, жеринде маселелерин укту. Аталган коомдун директору Усөнбай Бечеловдун айтымында, мүмкүнчүлүгү чектелген кызматкерлерди үзгүлтүксүз жумуш менен камсыздоонун башкы көйгөйү катары, мындагы буйрутмалардын аз болуп жатканы менен түшүндүрдү.

Ыйгарым укуктуу өкүл Абсаттар Сыргабаев, бул маселени чечүүдө, облустагы мекемелерге биргеликте иш алып баруу боюнча тийиштүү тапшырмалар берилээрин айтты. Мүмкүнчүлүк чектелген жарандардан эл аралык күнүнө карат облус башчысынын резервдик фондунан “Кыргыз азиздер жана дүйлөйлөр коомунун Жалал-Абад окуу өндүрүштүк ишканасына”, балдардын психоневрологиялык социалдык стационарлык мекемесине 20 миң сомдон акча каражаты бөлүндү.

Жалал-Абад облусунда жалпы 42 миңден ашуун ден соолугунан мүмкүнчүлүгү чектелген жарандар бар. Алардан 7 миң 371и 18 жашка чейинки балдар.

Ушул жылдын 23-ноябрына карата 6 миң 935 майыптыгы бар адамдарга жергиликтүү бийлик тарабынан 11 млн. 882 миң сом, демөөрчүлөр тарабынан 2 млн. 578 миң сомдук жардамдар көрсөтүлгөн. Мындан сырткары кышка карата 113 тонна көмүр алынып берилип, 116 студенттин окуу акыларына жеңилдиктер түзүлгөн.