1,101 Бардыгы /

ЖАЛАЛ-АБАД. Бүгүн, 1-апрелде Жалал-Абад шаарында облустагы массалык маалымат каражаттарынын жалпы өкүлдөрү чогулуп, Кыргызстан Журналисттер Союзунун Жалал-Абад облустук бөлүмүнө төрайым же төрага тандоону талкуулашты.

Жыйында адегенде президиумдун курамы бекитилип, алардын ичинен бирин тандоо каралды. Шайлоо жабык эшик артында өтүп, эки талапкердин ичинен Жумагүл Шайыкова көп добуш менен төрайым болуп шайланды. 

Ал эми жарыш сөзгө чыккандар мындан ары ишти жандантуу керектигин айтышып, ийгиликтерди каалашты.

Жумагүл Шайыкова кесиптештерине ыраазычылык айтуу менен журналисттердин ишеними чоң жоопкерчилик экенин, оор жүктү көтөрүү оңой болбой турганын белгилеп, жалпы журналисттердин колдоосу менен алдыга койгон максаттарга кадам ташташаарын белгиледи.

Андан соң журналисттер төрайымдын эки орун басары катары Ильяз Турбай уулу менен Кабылбек Көчкөнбай уулун шайлап алышты.

Эске салсак, буга чейин Руслан Калматов Кыргызстан Журналисттер Союзунун Жалал-Абад облустук бөлүмүнүн төрагасы болуп келген. Ал 2 жыл алдын өз каалоосу менен төрагалыкты тапшырып берген.