1,101 Бардыгы /

ЖАЛАЛ-АБАД. Жалал-Абад шаарынын Спутник кичи районунан 86 сотых жерге дагы 9 сотых муниципалдык жер аянтын кошуп алып, пайдаланып келген жарандын жери муниципалдык менчикке өттү.

Спутник кичи районунун Нооруз” паркынын жанынан 2003-жылы Акжол Бегалиев аттуу жаранга 86 сотых жер аянты 49 жылдык мөөнөт менен скважина жана сууда сүзүү үчүн бассейн курууга ижарага берилген. Тилекке каршы аталган жаран 86 сотых жерге дагы 9 сотых муниципалдык жер аянтын кошуп алып, пайдаланып келген. Жалал-Абад шаарынын вице-мэри Элдос Таев аталган жай тийиштүү мекеме-ишканалардын иш-аракетинин арты менен аныкталып, жерди тосмолор менен тосуу иши жүрүп жатканын билдирди.

Белгилей кетсек, Жалал-Абад шаарынын мэри Эрнисбек Ормоковдун тапшырмасы менен калаадагы мыйзамсыз берилип кеткен жана басып алынган жерлерди тактоо, кайрадан муниципалдык менчикке кайтаруу иштери жүрүп жатат.