1,014 Бардыгы /

ЖАЛАЛ-АБАД. Бүгүн 9-июнда Жалал-Абаддын кире беришинде күжүрмөн самбо боюнча Азия биринчилигинде алтын медаль уткан ИИМдин Атайын багыттагы полкунун Жалал-Абад шаарындагы өзүнчө ротасынын кызматкери, милициянынулук сержанты Бекболсун Керимбековду жана күмүш медалга ээ болгон «Динамо» спорт клубунун тарбиялануучусу Таласбек Нуралиевди тосуп алуу иш-чарасы өттү.

Жалал-Абад ОИИБдин басма сөз кызматынын маалыматына ылайык,

ага Кыргыз Республикасынын Президентинин Жалал-Абад облусундагы ыйгарым укуктуу өкүлү Абсаттар Сыргабаев, Жалал-Абад ОИИБдин начальниги АшимТагаев, ИИМдин Атайын багыттагы полкунун Жалал-Абад шаарындагы өзүнчө ротасынын командири Равшанбек Кожобеков, машыктыруучулар жана спортчулардын жакындары катышышты.

Иш-чаранын жүрүшүндө спортчулардын ийгиликтери Жалал-Абад облусу үчүн чоң жетишкендик экендиги белгиленди. Алардын мындан кийинки боло турган дүйнөлүк чемпионатта биринчиликти багындыруусу, ал үчүн талыкпастан машыгып, кыргыз желегин бийиктерге желбиретүү тилектери айтылды.

Күжүрмөн самбо боюнча Азия биринчилиги 2-4-июнь күндөрү Ливан өлкөсүндө болгон. Бекболсун Керимбеков 98 кг салмакта, ал эми Таласбек Нуралиев +98 кг салмакта күч сынашкан.

БЫЙЫЛ 30ГА ЖАКЫН МЕКТЕПТИ ЫСЫК ТАМАККА ӨТКӨРҮҮ ИШТЕРИ ЖҮРГҮЗҮЛӨТ

ЖАЛАЛ-АБАД. Бүгүн, 9-июнда Кыргыз Республикасынын Президентинин Жалал-Абад облусундагы ыйгарым укуктуу өкүлү Абсаттар Сыргабаев “Мерсико” эл аралык уюмунун “Билим үчүн азык жана балдардын тамактануусу” программасынын өкүлдөрү менен жолугушту.

Буга чейин Кыргыз Республикасынын Билим берүү жана илим министрлиги, Саламаттык сактоо министрлиги жана “Мерсико” менен биргеликте беш жылдык программаны ишке ашыруу боюнча өз ара түшүнүшүү жөнүндө меморандумга кол коюшкан. Ага ылайык бул жылы Жалал-Абад облусундагы 30га жакын мектепти ысык тамакка өткөрүү иштери жүргүзүлөт.

Программа тамак-аш менен камсыз кылуудан тышкары мектептердин инфраструктурасын жакшыртууга жана тамактануу жайларын эл аралык стандарттарга ылайык жабдууга көмөктөшөт. Ошондой эле ысык тамак уюштуруу боюнча башталгыч класстын мугалимдерин, ашпозчуларды жана мектеп жетекчилерин окутуудан өткөрөт. Облус боюнча 2017-жылдан тарта аталган программанын көмөгү менен 108 мектеп ысык тамак берүүгө өткөн.

Жолугушуунун алкагында облуста иш алып баруу пландары тууралуу маалымат берилди. Айрым көйгөйлөр айтылып, чечүү жолдору талкууланды. Облус башчысы балдардын ден соолугун сактоо, билим сапатын жакшыртуу үчүн ар дайым кызматташууга даяр экенин билдирди. Бул багытта аймактардагы жергиликтүү бийлик, мектеп жетекчилиги тарабынан керектүү жардамдар көрсөтүлөөрүн айтты.