2,499 Бардыгы /

          БАТКЕН. ЖИА Бизнес-ассоциациясы, Ишкердикти колдоо борбору жана Кыргыз Республикасынын Президентинин Баткен облусундагы  ыйгарым укуктуу Өкүлчүлүгү менен биргеликте үстүбүздөгү жылдын 25-июнь күнүн “ӨРҮК EXPO” айыл чарба майрам-жармаңкесин уюштурат.

Баткен ЖИАнын аткаруучу директору Муратбек Газыевдин айтымында, бул иш-чаранын эң башкы максаты – Баткен облусунда өрүк жана башка айыл чарба өндүрүмдөрүнүн баалуулугун өркүндөтүү. Анткени, Баткен облусунун аймагында багбанчылык, мунун ичинде өрүк өстүрүү эң чоң багыт катары эсептелет. “ӨРҮК EXPO”айыл чарба майрам-жарманкесин уюштуруучулардын маалыматына караганда, Баткен облусунун аймагында өрүк бактары 10 миң гектардан ашуун аянтты ээлейт жана жергиликтүү калктын негизги киреше булагы катары эсептелет.Баса, түшүм мыкты болгон жылы 60 миң тоннадан ашуун түшүм алынат. Жыйналган түшүм сырье жана даяр өнүм түрүндө кошуна мамлекеттерге жана Орусияга, андан ары Европага, Америка,  Жапонияга чейин экспорттолот. Мындай чоң жумушту аткарган Баткен жергесинде бир нече чоң жана орто ишканалар дагы бар.

Белгилей кетчү жагдай: Бул ирет “ӨРҮК EXPO” айыл чарба майрам-жарманкеси Апас Жайнаков атындагы Баткен облустук музыкалык драма театры жана шаардык борбордук аянтта өткөрүлөт.

Алишер ТОКСОНБАЕВ, өз кабарчы