21 Бардыгы /

Кечээ, Жалал-Абад шаарында бильярддын “Айкалышкан пирамида” түрү боюнча эркектер жана аялдар арасында дүйнө чемпионаттынын салтанаттуу ачылуу аземи болуп өттү.

Жалал-Абад шаардык мэриясынын маалымат борбору билдиргендей,

иш-чарага Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев, Жалал-Абад шаарынын мэри Эрнисбек Ормоков, Жогорку Кеңештин Төрагасынын орун басары Нурланбек Азыгалиев, Жогорку Кеңештин депутаты Шайырбек Ташиев, Жалал-Абад шаардык кеңешинин төрагасы Орозбек Турдубеков, бильярд боюнча эл аралык калыстар тобу жана бильярд спортунун күйөрмандары катышты.

Дүйнөлүк чемпионатка 20дай өлкөдөн 80 спортчу катышууда. Алардын катарында Кыргызстандан 14 спортчу бар. Алардын эң кичүүсү 13 жашта.

Оюндардын жалпы байге фонду 5 млн. сомду түзөт.

Оюндардын жарым финалы жана финалдык беттештери Жалал-Абад шаарындагы Кыргыз футбол биримдигинин имаратында, калган оюндар шаардагы “Legend.kg” бильярд клубунда өтөт.

Белгилей кетсек, бильярд боюнча Дүйнөлүк чемпионат өлкөнүн түштүк аймагында, анын ичинде Жалал-Абадда алгачкы ирет өтүп жатат.