1,017 total views

Европа Биримдигине (ЕБ) мүчө өлкөлөрдүн тышкы иштер министрлеринин 22-февралда өтө турган жыйынында оппозициячыл саясатчы Алексей Навальныйдын камалышына байланыштуу Орусияга жаңы санкцияларды киргизүү маселеси талкууланат.

Брюсселде 27 өлкөнүн дипломаттарынын жолугушуусунда орусиялык аткаминерлердин жана уюмдардын активдерин тоңдуруу, виза берүүгө тыюу салуу чаралары каралышы мүмкүн. Бул кадамдын алдында ЕБдин ичинде бир нече жума талкуу өткөн.

Навальный ага кол салуунун артында Орусиянын президенти Владимир Путин менен Федаралдык коопсуздук кызматы турат деп эсептейт. Кремль бул айыптоолорду четке кагып келет.

Октябрда ЕБ Навальныйдын «Новичок» заты менен ууландырылышына байланыштуу орусиялык алты аткаминерди кара тизмеге киргизген.

Орусияга карата жаңы чара көрүү чечими кабыл алынса, тышкы иштер министрлер ЕБнын дипломатиялык кызматтарына Навальныйдын камалышына, ууландырылышына тиешеси бар кишилердин тизмесин түзүүнү тапшырышат.

Алексей Навальный былтыр августта Омск шаарында ууландырылган соң, Германияда дарыланып аман калган. Ал өткөн айда Германиядан дарыланып келээри менен “Шереметьево” аба майданында камакка алынган.

WWW