18,552 Бардыгы /

Бул дарак “Арзуу” деп аталат. Мен аны 20 жылдан бери издеп журуп бугун гана кезиктирдим. Анын жанынан мин-мертебе жолу өткөн экенмин, бирок корбопмун. Ч.Айтматовдун “Кызыл алмасындай” болуп мага көрүнбөй жүрүптүр. Бүгүн жаздын тумандуу, нымдуу күнүндө дем алыш күнүмдү үйдө өткөрөйүн деген планым кокусунан бузулуп, радиого чакырышканда мойнум жар бербей зорго чыктым эле. Кайтып келатканымда негедир Токтогул паркын аралап өтүүнү чечтим. Жаздын деми ушул учурда парктан сезилет экен. Дарактарга жан кире баштаптыр. Негедир, бир-эки түгөйлөрдөн башка жан адам жок ээн парктан кетким келбей, дагы баягы “Арзуу” даракты издей баштадым. Бул дарактын романтикалуу таржымалын 20 жыл мурун бир жаш жигиттен уккандан бери издеп жүрөм. Бирок эч бир таба алчу эмесмин. Бул дарак бирөөнүн “Арзуу” дарагы эле. Ал парктын ичиндеги чоң жолдун эле боюнда экен. Бирок, көрүшүн көрүп жүрөгүм ооруду. Сүйүшкөндөрдөй болуп оролушуп өскөн дарактын уч жагын кыйып кетишиптир. Жоон бутактары мунжу болуп турушат. Кандай жүрөктөрү керең, таш боор адамдар. Бул даракка “Арзуу” деп ысым берип, сүйүүнүн символу катары өзүнүн ыйык сезимдерин аны менен байланыштырган жүрөгү таза, жан дүйнөсү терең, ой чабыты бийик ошол жаш жигит азыр кайда болду экен, бул даракты кийин көрдүбү? Менин жүрөгм ушунчалык ооруду, ал көрсө кантти экен?

Зинакан Пасаңова,Ош шаары