2,970 Бардыгы /

“Аймак” гезитинин үстүбүздөгү жылдын 1-июнь№19 саны толук бойдон белгилүү окумуштуу, экономика илимдеринин доктору, Жалал-Абад шаарындагы эл аралык университетинин ректору, профессор Токтомаматов Кантөрө Шариповичтин арабыздан кеткендигинин кырк күн болгонуна арналыптыр. Кантөрө Шариповичтин ким экенин ошол газетаны окуган адам дароо түшүнөт.

К. Шарипович эч кимге жамандыгы жок, ар бир сөзүн терең ойлонуп сүйлөгөн , токтоо, айкөл, адам баласына ар дайым жакшылык каалап, жараткандан элибизде тынччылык, аманчылык болсо деп тилеген адам эле. Кандай оор маселе болбосун кыйкырып, өкүрүп бирөөгө катуу айтканын көрбөдүм же “Кантөрө бирөө менен кермур айтышыптыр” деген сөз бир да жерде болбогондугу ал кишинин айкөл адам болгонун айкындап турат. Кантөрө аке техникумдун базасында институт уюштуруп, ал институтту университетке, университетти эл аралык университетке айландырды, бул эмгек айтканга жеңил көрүнгөнү менен кыла келгенде өтө оор иш. Мындай оор маселе бардык эле адамдардын колунан келе бербейт. Кантөрө Шариповичтин өзүнө гана таандык күлкүсү бар болчу. Ал киши жылмайып , адамды тиктегенде жылдызы жанып кетээр эле. Ошол жакшы сапаты өзү менен кошо кетти ыраматылык. Эмне дейбиз ажалга айла жок экен, Кантөрө Шариповичтин ичкен суусу түгөнүп , чын дүйнөгө кетти. Жаткан жери жайлуу, топурагы торку болсун дегенден башка айла жок. Мен чакан макала жазып, ал кишини эскерип отурганымдын себеби, Кантөрө акенин артында калтырган опур тоодой эмгегин эске алып, өзү чейрек кылым ректор болуп иштеген окуу жайга ал кишинин ысымын ыйгарып койсок , К.Шариповичтин арбагы сүйүнүп, артында калтырган шакирттерине, досторуна, окуучуларына жана жалпы кыргыз элине ыраазы болмок.

Сагын ЭШМЕ, Кыргыз Республикасынын улуттук жазуучулар жана журналисттер уюмунун мүчөсү